رەسەي ءسىم سەرگەي لاۆروۆ.

رەسەي اقش-قا زىمىران كەلىسىمىنە بايلانىستى جاۋاپ دايىنداۋدا.

قازان ايىنىڭ 28-ءى كۇنى رەسەي ءسىم سەرگەي لاۆروۆ «روسسيا-1» تەلەارناسىنداعى «ماسكەۋ. كرەمل. پۋتين» باعدارلاماسىندا: «اقش ءوزىنىڭ رەسەيمەن اراداعى زىمىران كەلىسىمىنەن شىعاتىنىن مالىمدەمەس بۇرىن ءسىم ارنايى قۇجات جىبەرگەن. وندا رەسمي ۋاشينگتوننىڭ ماسكەۋگە قويعان تالاپتارى مەن كەلىسىمنىڭ ورىندالماي وتىرعان بولىكتەرىنىڭ ءتىزىمى جازىلعان. ءبىز قازىر اتالمىش قۇجات بويىنشا جۇمىس ىستەپ جاتىرمىز. الداعى ۋاقىتتا زىمىران كەلىسىمىنە بايلانىستى اقش-قا جاۋاپ بەرەمىز» - دەپ مالىمدەدى.

ەستەرىڭىزگە سالايىق، بۇعان دەيىن اقش پرەزيدەنتى دونالد ترامپ رەسەيمەن اراداعى زىمىران كەلىسىمىنەن شىعاتىندىعىن مالىمدەگەن. ونىڭ سوزىنشە، اق ءۇي اكىمشىلىگىنىڭ بۇنداي قادامعا بارۋىنا رەسەيدىڭ وزىنە جۇكتەلگەن مىندەتتەردى ورىنداماۋى سەبەپ بولعان.

"The Qazaq Times"