شىنجاڭداعى ۇيرەنۋ لاگەرلەرى. فوتو: Ap.

اۋستراليا  سىرتقى ىستەر مينيستىرلىگى مالىمدەمە تاراتىپ،  بىلتىر 3 اۋستراليالىق ازاماتتىڭ قىتايدىڭ شىنجاڭداعى «ۇيرەنۋ لاگەرىنە» قامالعانىن ايتتى. سونىمەن بىرگە، بۇعان بايلانىستى قىتاي ۇكىمەتىنەن تۇسىنىكتەمە بەرۋىن سۇراعان تالاپتارى جاۋاپسىز قالعانىن مالىمدەدى.  

اۋستراليا ءسىم باسشىسى گرەم فلەتچەردىڭ (Graham Fletcher) ايتۋىنشا،  رەسمي كانبەررا ءوز ازاماتتارى ەلگە قايتىپ كەلگەننەن كەيىن عانا ولاردىڭ شىنجاڭداعى لاگەردە قامالعانىنان حاباردار بولعان. ال، وعان دەيىن قىتاي ۇكىمەتى اۋستراليالىقتاردىڭ قامالعانى تۋرالى ەشقانداي مالىمەت بەرمەگەن.

گرەم فلەتچەر سوزىندە: «قىتاي بيلىگى اۋستراليا جانە باسقا ەلدەردىڭ ديپلوماتتارىنىڭ شىنجاڭعا بارۋىنا كەدەرگىلىك جاساپ كەلدى. بىراق، ءبىز ديپلوماتتارىمىزدىڭ شىنجاڭعا بارۋىن ءالى دە قىتاي ۇكىمەتىنەن تالاپ ەتىپ كەلەمىز»، – دەپ حابارلاعان.

قىتايدىڭ اۋسترالياداعى ەلشىسى سول ەلدەگى باق وكىلدەرىنىڭ سۇراعىنا جاۋاپ بەرۋدەن باس تارتقان. ول تەك اتالعان «ۇيرەنۋ لاگەرىن» «كاسىپتىك ءبىلىم بەرۋ ورتالىقتارى» دەپ تۇسىندىرگەن. ءارى، قىتاي ۇكىمەتى وسى «كاسىپتىك ءبىلىم بەرۋ ورتالىقتارى» ارقىلى ءدىني ەكسترەميزمنىڭ الدىن الۋدا دەپ كورسەتەدى.

“The Qazaq Times”