فوتو: f10.pmo.ee

يوردانيا يزرايلگە جەردى جالعا بەرۋ شارتىنىڭ مەرزىمىن ۇزارتپايدى. بۇل تۋرالى رەسمي تۇردە يوردانيا كورولى ءىى ابداللا مالىمدەدى.

اتالعان كەلىسىم-شارت 2019 جىلى ءوز كۇشىن جويادى. سوعان قاراماستان، يزرايل پرەمەر-ءمينيسترى بينيامين نەتانياحۋ الداعى ۋاقىتتا ۋاعدالاستىق مەرزىمىن جالعاستىرۋ تۋرالى كەلىسسوزدەر وتكىزىپ، بۇل شەشىمدى قايتا جۇزەگە اسىرماق نيەتتە. ونىڭ ويىنشا، جالعا بەرۋ ۋاقىتى توقتاتىلسا، ەكى جاققا دا قارجىلىق داعدارىس تۋىندايدى. سول سەبەپتى قوس تاراپ دۇرىس شەشىم قابىلداۋى ءتيىس.

ايتا كەتەيىك، 1994 جىلى ءيزرايلدىڭ بۇرىنعى پرەمەر-ءمينيسترى يتسحاك رابين مەن حۋسەين كورول جالعا جەر بەرۋ تۋرالى قۇجاتقا قول قويعان. شارتقا سايكەس يزرايلگە گاليلەي تەڭىزىنىڭ ماڭىنداعى شاعىن اۋماق پەن يوردانيانىڭ وڭتۇستىگىندەگى اۋىلشارۋاشىلىق جەرى جالعا بەرىلگەن.

"The Qazaq Times"