اقش قىتايدىڭ افريكاداعى جولىن كەسەتىن جاڭا ستراتەگيانى ىسكە قوسپاق

ترامپ ۇكىمەتى جاقىندا اقش-تىڭ جاڭا افريكا ستراتەگياسىن جاريا ەتپەك. قۇراما شتاتتىڭ افريكا ىستەرى جونىندەگى  وكىلى بۇل جايلى: «جاڭا افريكا ستراتەگياسى ارقىلى وڭىردەگى حالىقتى جۇمىسپەن قامتۋدى جوعارلاتىپ، ينۆەستيتسيا سالۋعا مۇمكىندىكتەر جاراتامىز.  بۇل ستراتەگيانىڭ افريكانىڭ جەدەل دامۋىنا قىتايدان كورى كوبىرەك ۇلەس قوساتىنىنا سەنىمدىمىز»، – دەگەن.

مەملەكەتتىك دەپارتامەنتكە قاراستى افريكا ىستەرى جونىندەگى حاتشىنىڭ كومەكشىسى  تيبور نەگي (Tibor Nagy) VOA اقپارات اگەنتتىگىنە بەرگەن سۇحباتىندا: «پرەزيدەنت ترامپقا دەيىن قۇراما شتات افريكاداعى سوعىسىتى توقتاتۋ، ادام قۇقىقتارىن قورعاۋ، جالپى جاعىدايدى ورنىقتى ۇستاۋ جۇمىستارىنا باسا ءمان بەرىپ كەلدى. تەك وسى ايتىلعاندار تولىعىمەن جۇزەگە اسقاننان كەيىن عانا ەكونوميكانى جەبەۋدى قولعا العان.  ال، جاڭا ستراتەگيا بۇدان وزگەشە.  ترامپ ۇكىمەتىنىڭ باستى ماقساتى سىرتتان كەلىپ ينۆەستيتسيا سالۋعا تولىقتاي جاعىداي جاساۋ بولىپ بەلگىلەنگەن، وسى ارقىلى قارجىگەرلەردى افريكا قۇرلىعىنا تارتۋدى كوزدەيدى»، – دەيدى.

2015 جىلى قىتاي ۇكىمەتى افريكاعا 60 ملرد اقش دوللار كولەمىندە كومەك قارجىسى مەن ينۆەستيتسيا سالاتىنىن مالىمدەگەن. ال قىركۇيەكتە وتكەن «قىتاي-افريكا فورۋمىندا» قىتاي بيلىگى بۇل قاراجاتقا تاعى  60 ملرد دوللار قوسقانىن مالىمدەگەن.

تيبور ناگي اقش پەن قىتايدىڭ افريكا ستراتەگياسىنىڭ باستى ايىرماشىلىعىن دا اتاپ كورسەتتى. ايتالىق، ول قىتاي ۇكىمەتى افريكاعا تەك قارجىلاي كومەك جاساۋمەن عانا شەكتەلگەنىن، ال، اقش-تىڭ جاڭا ستراتەگياسى افريكالىقتاردى جۇمىسپەن قامتۋ، سول ارقىلى ەكونوميكالىق كورسەتكىشتەرىنىڭ جوعارلاتۋعا نەگىزدەلگەن.

اقش ۆيتسە-پرەزيدەنت مايك پەنس قازاننىڭ باس شەنىندە جاساعان مالىمدەمەسىندە: «قىتايدىڭ كەدەي ەلدەرگە ارنالعان ينفراقۇرىلىمدىق نەسيەلەرىنىڭ وسىمدەرى انىق كورسەتىلمەگەن. قالاي بولسا دا بەيجىڭنىڭ تاباتىن تابىسى باسىمىراق»، – دەپ كورسەتكەن بولاتىن. سونىمەن قاتار مەملەكەتتىك حاتشى پومپەو بۇل ينفراقۇرىلمدار ۋاقىت وتە كەلە ءوڭىردىڭ قاۋىپسىزدىگىنە قاتەر ءتوندىرۋى مۇمكىن ەكەنىن ايتقان.

بەيجىڭ 22 قازان كۇنگى مالىمدەمەسىندە، اقش لاۋازىمدىلارىنىڭ بۇل سوزىنە جاۋاپ بەرىپ: اتالعان جوبا «ءبىر بەلدەۋ، ءبىر جول» ستراتەگياسى اياسىندا تاراپتارعا ورتاق پايدالى ەتىپ جوبالانعان.  قۇراما شتاتتىڭ بۇل ايىپتاۋلارىنا ەش نەگىز جوق. ءارى بۇل جالا جابۋ مەن ارانداتۋشىلىق بولىپ سانالادى»، – دەپ باعالاعان.

“The Qazaq Times”