ترامپ رەسەيمەن اراداعى زىمىران كەلىسىمىنەن شىعاتىنىن مالىمدەدى

اقش پرەزيدەنتى دونالد ترامپ رەسەيمەن اراداعى زىمىران كەلىسىمىنەن شىعاتىنىن مالىمدەدى.

ترامپتىڭ سوزىنشە، رەسمي ماسكەۋ اقش-پەن اراداعى زىمىران كەلىسىمىنىڭ شارتتىرىن ورىنداپ وتىرعان جوق. ول ءوز سوزىندە: «ەگەر رەسەي مەن قىتاي جاڭا باعىتتا جۇمىس ىستەۋگە كەلىسپەسە، ءبىز زىمىران كەلىسىمىنەن شىعىپ، قارۋدىڭ جاڭا تۇرلەرىن قۇراستىرۋعا كىرىسەمىز» -دەپ مالىمدەدى.

اقش پەن كەڭەستەر وداعى 1987 جىلى زىمىران كەلىسىمىنە قول قويعان. كەلىسىم بويىنشا، قوس تاراپ 300-دەن 3400 ميل قاشىقتاققا دەيىن جەردەن ۇشىرىلاتىن بالليستيكالىق زىمىرانداردى شىعارماۋعا ۋاعدالاسقان. كەلىسىمگە سول كەزدەگى اقش پرەزيدەنتى رونالد رەيگان مەن كەڭەس وداعىنىڭ باسشىسى ميحايل گورباچەۆ قول قويعان.

اقش پرەزيدەنتى دونالد ترامپتىڭ مالىمدەمەسىنەن كەيىن ميحايل گورباچەۆ «ينتەرفاكس» باسىلىمىنا بەرگەن سۇحباتىندا اق ءۇي اكىمشىلىگىنىڭ رەسەيمەن اراداعى زىمىران كەلىسىمىنەن شىعۋى ۇلكەن قاتەلىك ەكەندىگىن ايتىپ، «يادرولىق قارۋسىز الەم» جاقتاستارىن اتالمىش كەلىسىمدى ساقتاپ قالۋعا شاقىردى.

بۇعان دەيىن رەسەي پرەزيدەنتى ۆلاديمير پۋتين سوچي قالاسىندا وتكەن «ۆالداي» پىكىرتالاس كلۋبىنىڭ وتىرىسىندا يادرولىق سوعىس جونىندە مالىمدەمە جاساعان. وندا ول: «ءبىزدىڭ يادرولىق قارۋدى پايدالانۋىمىزدا ءبىرىنشى بولىپ سوققى جاساۋ كونتسەپتسياسى جوق. ەگەر قانداي دا ءبىر ارانداتۋشى رەسەيگە يادرولىق شابۋىل جاسايتىن بولسا، ءبىز وعان مىندەتتى تۇردە جاۋاپ بەرەمىز. ارانداتۋشى ءوزىنىڭ جازاسىز قالمايتىنىن، كوزىنىڭ جويىلاتىنىن ءبىلۋى ءتيىس. ءبىز ارانداتۋشىنىڭ قۇربانى رەتىندە جۇماققا بارامىز. ال ولار ولەدى» - دەپ مالىمدەگەن.

"The Qazaq Times"