امەريكاعا كىرمەك بولعان گوندۋراس بوسقىندارى. فوتو: VOA.

اقش پرەزيدەنتى دونالد ترامپ ءوزىنىڭ تۆيتتەر پاراقشاسىندا مالىمدەمە جاساپ، ەگەر مەكسيكا زاڭسىز ميگرانتتاردىڭ اقش-قا كىرۋىن توقتاتا الماسا، وندا قۇراما شتات ەكى ەل شەكاراسىنا ارنايى اسكەرلەردى جىبەرەتىنىن ايتتى.

اقش پرەزيدەنتى ءوزىنىڭ الەۋمەتتىك جەلى پاراقشاسىندا: «دەموكراتتاردىڭ باستاپ كەلگەن يمميگرانتتارى قۇراما شتاتقا شابۋىل جاساپ جاتىر»، – دەپ ايىپتادى. ول جانە كەيبىر كوشىپ كەلۋشىلەردى «قىلمىسكەر» دەپ كورسەتكەن.  سونداي-اق، ول مەكسيكا قۇراما شتاتقا قارسى بۇل «سوققىعا» قارسى شارالار قولدانىپ، زاڭسىز كوشۋ اعىنىن توقتاتپايتىن بولسا، وندا ورتالىق امەريكاعا بەرىلەتىن بارلىق كومەكتى توقتاتاتىنىن مالىمدەگەن.

ترامپتىڭ ءزىلدى ايىپتاۋلارى مەن مالىمدەمەلەرىنەن بىرنەشە كۇن بۇرىن، گوندۋراستىڭ مىڭداعان بوسقىنى گۆاتەمالا ارقىلى مەكسيكاعا كىرگەن بولاتىن. بۇل كوشىپ كەلۋشىلەر ايماقتاعى كەدەيلىك پەن زورلىق-زومبىلىقتان قۇتىلۋ ءۇشىن قۇراما شتاتتارعا كىرگىسى كەلگەن.

اقش مەملەكەتتىك حاتشىسى پومپەو اقش جەرگىلىكتى ۋاقىتىمەن بەيسەنبى كۇنى پاناما مەن مەكسيكاعا ساپارلاۋدى جوسپارلاعان.  ال جۇما كۇنى مەكسيكا پرەزيدەنتىمەن كەزدەسەدى. بۇل كەزدەسۋدە ميگرانتتار ماسەلەسى دە تالقىلانادى دەپ كۇتىلۋدە. دەگەنمەن، مەكسيكا تارابى ترامپتىڭ تۆيتتەردەگى «بايبالامىنا» ءالى جاۋاپ قاتقان جوق.

“The Qazaq Times”