گرۋزيا پروكۋراتۋراسى سااكاشۆيليدىڭ كىسى ولتىرۋگە قاتىسى بار ەكەنىن ايتتى

گرۋزيانىڭ پروكۋراتۋراسى ميللياردەر باردري پاتاركاتسيشۆيليدى ءولتىرۋ ىسىنە بايلانىستى ءىستى تەكسەرىپ انىقتاعانىن جاريالادى. اتالعان ميللياردەر 2008 جىلى اقپاندا لوندونعا جاقىن ماڭدا قازا تاپقان بولاتىن. پروكۋراتۋرا تارابى ىشكى ىستەر مينيسترلىگىنىڭ بۇرىنعى جوعارى دارەجەلى ءۇش لاۋازىمدىسىن بۇل ىسكە قاتىسى بار دەپ ايىپتادى.

ءىىم-نىڭ بۇرىنعى قىزمەتكەرلەرىنىڭ اۋديو جازبالارى تابىلدى

پروكۋراتۋرا تارابى ءىىم-ءنىڭ بۇرىنعى لاۋازىمدىلارى رەۆاز شيۋكاشۆيلي، لەۆان كارداۆا جانە گەوركي مەرەباشۆيلي قاتارلىلارعا كىسى ءولتىرۋ ءىسىن جوسپارلاعان جانە قىزمەت قۇقىعىن اسىرا پايدالانعان دەگەن تاققان. اشالاپ ايتقاندا، ءىىم-ءنىڭ كونستيتۋتسيالىق قاۋىپسىزدىك جونىندەگى دەپارتامەنتتىڭ بۇرىنعى قىزمەتكەرى 52 جاستاعى بيزنەسمەنگە ميللياردەر باردري پاتاركاتسيشۆيليدى ءولتىرۋ ءىسىن 2007 جىلى جوسپارلاعان دەپ كورسەتكەن.

كەشە گرۋزيا پروكۋراتۋراسى جاريالاعان ماتەريالدار اراسىندا جوعارىدا تاعىلعان ايىپتى دالەلدەيتىن اۋديو قۇجاتتار دا بولعان. بۇل اۋديو جازبادا ايىپتالۋشىلاردىڭ ءبىرى ميللياردەردى ءولتىرۋ جوسپارى قازىرگى پرەزيدەنت ميحايل سااكاشۆيلي جاعىنان سانكتسيالانعانىن ءسوز ەتەدى.

اۋديو جازبالارىنىڭ ەندى بىرىندە ايىپتالۋشىلار ميللياردەر پاتاركاتسيشۆيليدى ءولتىرۋ ءىسىن اقىلداسقان. پروكۋراتۋرانىڭ ايتۋىنشا بۇل اۋديو جازبالار ايىپتاۋشىلاردىڭ بىرەۋىنىڭ ۇيىنەن تابىلعان.

گرۋزيالىق ميللياردەر باردري پاتاركاتسيشۆيلي. فوتو: BBC

سااكاشۆيلي: بۇعان ەشكىم سەنبەيدى، مەنىڭ بۇل ىسپەن قاتىسىم جوق

سااكاشۆيلي بولسا ءوزىنىڭ BBC-گە بەرگەن سۇحباتىندا بۇل ءىستى تەرىستەپ: «بىرنەشە كۇننەن كەيىن سايلاۋ وتەدى. ماقساتتارىنا جەتە الماعان بۇل رەجيم جانتالاسۋدا. بۇل ادامدار تۇرمەدە وتىر. قازىر ولارعا قانداي دا ءبىر جازبانى ايتىپ بەرىپ جازدىرىپ السا بولادى. ولار نەنى قالاسا سونى ايتىپ بەرىپ جازدىرىپ العان. الايدا، گرۋزيادا بۇعان ەشكىم سەنبەيدى. مەنىڭ بۇل ىسپەن قاتىسىم جوق»، – دەيدى.

رەسەي جانە گرۋزيا ۇكىمەتتەرىمەن شەكىسكەن ميللياردەردىڭ تاريحى

2008 جىلدىڭ 12 اقپانىندا لوندون ماڭىندا قازا تاپقان ميللياردەردىڭ ءولىمى ءتۇرلى پىكىرلەرگە مۇرىندىق بولعان. ول ايىپتالعان 52 جاستاعى بيزنەسمەن جانە بوريس بەرەزوۆسكيدىڭ بيزنەستەگى وداقتاسى سانالادى. باردري پاتاركاتسيشۆيليدىڭ ولىمىنە بايلانىستى تەرگەۋدىڭ رەسمي قورتىندىلارىندا ونى جۇرەك اۋىرۋى ۇستاپ قازا بولعانىن ايتىلعان بولاتىن.

باردري پاتاركاتسيشۆيليدىڭ سول كەزدەگى گرۋزيا بيلىگىمەن بولعان بايلانىسى تىم كۇردەلى. سونداي-اق، رەسەي بيلىگىمەن دە اراسى سالقىن بولعان. ول رەسەيدە ورت جانە تۆ-6 قاتارلى ەكى تەلەارنانىڭ جەتەكشىلىك قىزمەتىن اتقارعان. 2001 جىلى رەسەي بيلىگى جاعىنان نيكولاي گلۋشكوۆتىڭ قاشىپ كەتۋىنە جاردەمدەسكەن دەگەن ايىپ تاققان. ال، ءبىر جىلدان كەيىن وعان جانە قىرۋار قارجىنى جىمقىردى دەگەن ايىپ قوسا تاعىلعان.

وسى ايىپتاۋلاردان كەيىن باردري پاتاركاتسيشۆيلي گرۋزياعا كەتەدى دە، رەسەي جاعىنان حالىقارالىق ىزدەۋ جاريالانادى. بىراق، ورىس ۇكىمەتى ونى ۇستاي الماعان. ول گرۋزيا، ۇلىبريتانيا جانە يزرايل اراسىندا ەركىن قاتىناپ تۇرعان.

گرۋزيادا دا ءبىر تەلەارنا قۇرعان پاتاركاتسيشۆيلي 2007 جىلدان باستاپ بيلىكپەن بولعان مامىلەسى ناشارلايدى. ءتىپتى سول ۋاقىتتاردا ول پرەزيدەنت سااكاشۆيليدى تاقتان تايدىرۋ ءۇشىن ءوز قارجىسىن ايامايتىنىن اشىق بىلدىرگەن. سول جىلدىڭ قاراشاسىندا ونىڭ تەلەارناسى تبليسيدەگى ۇكىمەتكە قارسى ەرەۋىلدى تاراتقانى ءۇشىن توقتاتىلادى. ال، پاتاركاتسيشۆيليدىڭ وزىنە قىلمىستىق ايىپ تاعىلادى.

2008 جىلى گرۋزياداعى پرەزيدەنتتىك سايلاۋدان كەيىن ۇكىمەت پاتاركاتسيشۆيليگە ەكىنشى رەت ايىپ تاقتى. بۇل رەتتە وعان بيلىكتى قۇلاتۋ ىستەرىن ۇيىمداستىردى، ساياساتكەرلەرگە قاستاندىق جاساۋعا تىرىستى جانە تەررورلىق شابۋىل ۇيىمداستىردى دەگەن ايىپتار تاقتى. ول ميللياردەر بولسا بۇل ايىپتاۋلاردى «جالا جابۋ» دەپ باعالاعان ەدى. كوپ ۇزاماي ول ۇلىبريتانيادا قازا تاپتى.

گۋرزيا بيلىگى الماسقاننان كەيىن، 2012 جىلى ول قۇرعان تەلەارنا جاقىن تۋىستارىنا قايتارىلىپ بەرىگەن.

كىسى ءولتىرۋ ءىسىن انىقتاۋ ما، ساياسي ويىن با؟

ءىىم-نىڭ بۇرىنعى قىزمەتكەرلەرى وزىنە تاعىلعان ايىپتاردى جوققا شىعارعان. ولاردىڭ اقتاۋشى ادۆوكاتتارى بۇل ايىپقا بايلانىستى دالەرلەردىڭ تولىق ەمەس ەكەنىن ايتادى. سونىمەن بىرگە ادۆوكاتتار تاعى ءبىر تۇسىنىكسىز ماسەلەنى ورتاعا قويعان. ولاردىڭ كورسەتۋىنشە، بۇل اۋديو جازبالارى 2016 جىلى تابىلعان، سودان بەرى پروكۋراتۋرا تارابى بۇل تۋرالى قانداي دا ءبىر مالىمەتتەردى تاراتپاعان جانە تەك ەندى عانا ايىپتالۋشىلارعا قاراتا دالەل رەتىندە تارتىلىپ وتىر.

وسى جاعدايلارعا بايلانىستى، گرۋزيا مەن باسقا دا ەلدەردىڭ اقپارات قۇرالدارى بۇل ءىستى سايلاۋ الدىنداعى ساياسي ويىندار قاتارىندا باعالاپ جاتىر.

“The Qazaq Times”