اقش تاجىكستانعا اسكەري كومەك بەردى

اقش ەلشىلىگى تاجىكستانعا شەكاراداعى ەسىرتكى تاسىمالىنىڭ الدىن الۋ ءۇشىن جانە تەرروريزممەن كۇرەسۋ ماقساتىندا قۇنى 8 ميلليون دوللار بولاتىن اسكەري جابدىقتار بەردى.

اقش ەلشىلىگىنىڭ دۋشانبەدەگى قىزمەتكەرى كەۆين كوۆەرت تاجىكستانداعى قاۋىپسىزدىك ورتالىق ازياداعى تۇراقتىلىقتىڭ كەپىلى دەپ اتاپ ءوتتى. «تاجىكستانعا بەرىلگەن اسكەري تەحنيكالاردىڭ قۇنى 8 ملن دوللاردان اسادى. ءبىز ارقاشان تاجىكستانعا قاۋىپسىزدىكتى ساقتاۋ ءۇشىن، اۋعانستانمەن شەكارانى نىعايتۋ ءۇشىن قولداۋ بىلدىرەمىز»، - دەدى ول.

كەۆين كوۆەرتتىڭ سوزدەرىنشە، ۆاشينگتون جىل سايىن تاجىكستانعا 70 ملن دوللار كولەمىندە قايتارىمسىز كومەك كورسەتەدى.

تاجىكستان بيلىگى اقش تاراپىنان جاسالىناتىن اسكەري كومەكتىڭ ماڭىزدى ەكەنىن ايتادى. تر ۇلتتىق قاۋىپسىزدىك مەملەكەتتىك كوميتەتىنىڭ توراعاسى سايمۋمين ياتيموۆ مۇنداي ىنتىماقتاستىق حالىقارالىق تەرروريزممەن كۇرەستە ناتيجەسىن بەرەدى، قاۋىپسىزدىكتى نىعايتۋعا كومەكتەسەدى دەيدى.

اۋعانستاننىڭ سولتۇستىك پروۆينتسياسىندا "يسلام مەملەكەتى", ء"تاليبان" سەكىلدى تەرروريستىك ۇيىمداردىڭ وشاعى ورنالاسقان.

"The Qazaq Times"