يندونەزيا پرەزيدەنتى تابيعي اپاتقا بايلانىستى شەتەلدەردەن كومەك سۇرادى

يندونەزيا پرەزيدەنتى جوكو ۆيدودو مالىمدەمە جاساپ، اپارتقا ۇشىراعان ورتالىق سۋلوەزيگە شەتەلدەردەن شۇعىل گۋمانيتارلىق كومەك كەرەك ەكەنىن مالىمدەدى.  پاۋلۋ قالاسىنا جاقىن سۋلوەزي ارالىندا جۇما كۇنى كۇشتى جەر سىلكىنىسى مەن تسۋناميدەن مىڭنان استام ادام قازا بولعان ەدى. بۇل تۋرالى WSJ باسىلىمى حابارلادى.

تابيعي اپات بولعان ايماقتاعى تۇرعىندار ازىق-تۇلىك، سۋ، مەديتسينالىق جاردەم، ۋاقىتتىق باسپانالار جانە وتىنعا مۇقتاج. كومەك كورسەتۋگە نيەتتى ەلدەردىڭ ۇكىمەتتەرى مەن حالىقارالىق كومەك كورسەتۋشى ۇيىمدار يندونەزيا پرەزيدەنتىنىڭ ۇسىنىسى بويىنشا كومەك كورسەتۋگە دايىن ەكەندىكتەرىن دە جەتكىزدى.

يندونەزيا ۇكىمەتىنىڭ جەكسەنبى كۇنى تاراتقان رەسمي مالىمدەمەسىندە، تابيعي اپاتتان قازا بولعاندار سانىن 832 ادام دەپ كورسەتكەن ەدى. 7,5 باللدىق جەر سىلكىنىسى كۇشتى تەڭىز تولقىنىن تۋدىرىپ، پالۋ مەن دونگارا قالالارىن سۋ باسقان. قۇتقارۋشىلار اپات ورىن العان الىس ايماقتارعا جەتە الماعاندىقتان، قازا بولعاندار سانى مىڭنان اسىپ كەتكەنى دە ايتىلۋدا.

يندونەزيانىڭ پرەزيدەنتى ۆيدودو جەكسەنبى كۇنى اپاتتى ايماقتاردى ارالاعان كەزدە، كوز الداعى باستى قيىنشىلىق ءزىلزالادا قيراعان قۇرلىستار مەن قۇلاعان تاستاردى تازارتۋ ءۇشىن اۋىر تەحنيكالاردى جەتكىزۋ ەكەنىن ايتقان. يندونەزيانىڭ ينۆەستيتسيالاردى ۇيلەستىرۋ كوميتەتىنىڭ توراعاسى توماس لانبان دۇيسەنبى كۇنى ەل پرەزيدەنتىنەن اپاتقا قارسى كۇرەس ءۇشىن شەتەلدىك كومەكتەردى جۇمىلدىرۋ مىندەتىن تاپسىرىپ العانىن مالىمدەگەن.

يندونەزيا قارجى ءمينيسترى سري مۋلياني يندارۋاتي دۇيسەنبى كۇنگى مالىمدەمەسىندە، جاراتىلىستىق اپاتتان زارداپ شەككەن وڭتۇستىك-شىعىس ايماققا 38 ملن اقش دوللارى كولەمىندەگى كومەك قاراجاتىنىڭ بوساتىلعانىن ايتقان.

ەل پرەزيدەنتىنىڭ شەتەلدەن كومەك سۇراۋىنان بۇرىن ەو تارابى 1,7 ميلليون اقش دوللارى كولەمىندەگى العاشقى شۇعىل گۋمانيتارلىق كومەك قارجىسىن بولگەن بولاتىن. بۇدان تىس قۇراما شتات تا العاشقىلاردىڭ ءبىرى بولىپ الەۋمەتتىك كومەك كورسەتەتىنىن جەتكىزگەن.

“The Qazaq Times”