ماكەدونيادا ەل اتاۋىن وزگەرتۋگە بايلانىستى وتكەن رەفەرەندۋم ساتسىزدىككە ۇشىرادى

30 قىركۇيەكتە ماكەدونيادا ەل اتاۋىن وزگەرتۋگە بايلانىستى وتكەن رەفەرەندۋم ويداعىداي وتپەدى.  سايلاۋشىلاردىڭ 90 %-ى ەل اتاۋىنىڭ وزگەرتىلۋىن قولداپ داۋىس بەرگەنمەن، ماكەدونيا «سولتۇستىك ماكەدونيا» بولىپ وزگەرتىلمەي قالدى. بۇل تۋرالى ماكەدونيانىڭ سايلاۋ كوميسسياسىنىڭ باسشىسى وليۆەر دەركوسكي مالىمدەدى، - دەپ حابارلايدى yeniakit.com.tr.

رەفەرەندۋمدا سايلاۋشىلار «ماكەدونيا رەسپۋبليكاسى مەن گرەكيا رەسپۋبليكاسىنىڭ اراسىنداعى كەلىسىمشارتتى قابىلداي وتىرىپ، ەو مەن ناتو-عا مۇشە بولۋدى قولدايسىز با؟» دەگەن سۇراققا جاۋاپ بەرگەن. نەگىزى، وسى كەلىسىمشارت بويىنشا ماكەدونيا «سولتۇستىك ماكەدونيا رەسپۋبليكاسى» دەپ اتالۋى ءتيىس بولاتىن. الايدا، سايلاۋشىلاردىڭ 90 %-ى ەل اتاۋىنىڭ وزگەرتىلۋىن قولداپ داۋىس بەرگەنمەن، ماكەدونيا «سولتۇستىك ماكەدونيا» بولىپ وزگەرتىلمەي قالدى. ماكەدونيا رەسپۋبليكاسىنىڭ سايلاۋ كوميسسياسىنىڭ باسشىسى وليۆەر دەركوسكيدىڭ ايتۋىنشا، رەفەرەندۋم ءۇشىن قاجەت سايلاۋشىلاردىڭ تەك 50 % -ى قاتىسقان. «بۇل رەفەرەندۋمدا شەشىمنىڭ قابىلدانبايتىنى وعان قاتىسۋشىلاردىڭ سانىنان-اق بەلگىلى بولدى»، - دەگەن دەركوسكي.

ەو مەن ناتو دا ماكەدونيانىڭ ەۋروينتەگراتسياسى مەن اتاۋىنىڭ وزگەرتىلۋى تۋرالى رەفەرەندۋمنىڭ قورىتىندىسىن قولداپ وتىر. ەۋرووداقتىڭ كورشىلىك ساياسات جونىندەگى كوميسسارى يوحاننەس حان ماكەدونيادا اياقتالعان رەفەرەندۋم قورىتىندىسىن «گرەكيامەن جاسالعان كەلىسىمشارتتى قولداۋ» دەپ اتادى. ول ءوزىنىڭ تۆيتتەر جەلىسىندەگى پاراقشاسىندا ساياسي ليدەرلەردىڭ بارلىعىن بۇل شەشىمگە قۇرمەتپەن قاراۋعا شاقىردى. رەفەرەندۋم قورىتىندىسىن ناتو-نىڭ باس حاتشىسى يەنس ستولتەنبەرگ تە قولداپ شىقتى. ول بۇنى ماكەدونيانىڭ ناتو قۇرامىنا كىرۋىنە بىردەن-ءبىر مۇمكىندىك دەپ اتادى.

ۇستىمىزدەگى جىلدىڭ ماۋسىم ايىندا ماكەدونيا مەن گرەكيا ماكەدونيانىڭ اتاۋىن سولتۇستىك ماكەدونيا دەپ اتاۋدى قاراستىراتىن تاريحي كەلىسىمشارتقا قول قويعان ەدى. بۇنىڭ وتەۋى رەتىندە گرەكيا ماكەدونيانىڭ ناتو مەن ەۋروپا وداعىنا مۇشە بولۋى تۋرالى كەلىسسوزدەردى بۇعاتتان شىعاردى. نەگىزى، ماكەدونيانىڭ اتاۋىنا قاتىستى داۋ 1990 جىلداردان بەرى جالعاسىپ كەلەدى.

“The Qazaq Times”