فوتو: worldbulletin.net

ءازىربايجان مەن ارمەنيا ءسىم باسشىلارى ەلمار مامدياروۆ پەن زوگراب مناتساكانيان تاۋلى قاراباح ماسەلەسىن رەتتەۋگە قاتىستى كەلىسسوزدەردى كەلەسى ايدا جالعاستىرماق. بۇل تۋرالى ءازىربايجان ءسىم-ءنىڭ ءباسپاسوز قىزمەتى بۇۇ باس اسسامبلەياسىنىڭ اياسىندا ەكى ەلدىڭ ءسىم باسشىلارى اراسىندا وتكەن كەزدەسۋدىڭ قورىتىندىسى بويىنشا حابارلادى.

«كەزدەسۋ ءۇش ساعاتقا سوزىلدى. تاۋلى قاراباح ماسەلەسىندە ءبىر شەشىمگە كەلۋگە، ايماقتا بەيبىتشىلىك ورناتۋعا باعىتتالعان ماڭىزدى پىكىرلەر الماستى. ءبىز وسى كەلىسسوزدەردى كەلەسى ايدا جالعاستىرۋعا كەلىستىك»، - دەگەن ءازىربايجان ءسىم باسشىسى ەلمارا مامەدياروۆ.

ارمەنيا مەن ءازىربايجان اراسىنداعى تاۋلى قاراباح ماسەلەسىنە قاتىستى داۋ 1988 جىلدىڭ اقپان ايىندا تاۋلى قاراباح اۆتونوميا اۋماعى ءازىربايجان قۇرامىنان شىعاتىنى تۋرالى مالىمدەگەن كەزدە باستالدى. 1992-1993 جىلدارداعى قارۋلى قاقتىعىس كەزىندە ءازىربايجان تاۋلى قاراباح پەن وعان قاراستى جەتى اۋداننان ايىرىلدى. 1992 جىلدان باستاپ وبسە-ءنىڭ مينسك توبىنىڭ اياسىندا وسى داۋدى بەيبىت جولمەن رەتتەۋگە قاتىستى كەلىسسوزدەر جۇرگىزىلىپ كەلەدى. ەكى ەل ارا-قاتىناسىن شيەلەنىستى جاعدايعا جەتكىزگەن ماسەلەنىڭ رەتتەۋگە رەسەي، اقش جانە فرانتسيا ەلدەرى دە اتسالىسىپ كەلگەنمەن، اتالعان ايماققا قاتىستى داۋدىڭ ەندىگى بارىسى قازان ايىندا بەلگىلى بولماق.

“The Qazaq Times”