يزرايل پرەمەرىنىڭ مالىمدەمەسىنە بايلانىستى يران بۇۇ-نى قاتاڭ شارا قولدانۋعا شاقىردى

يراننىڭ بۇۇ-داعى تۇراقتى وكىلى بۇۇ-نىڭ قاۋىپسىزدىك كەڭەسى مەن باس حاتشىلىعىنا ءيزرايلدىڭ يادرولىق باعدارلاماسىن مۇقيات زەرتتەۋگە شاقىردى، - دەپ حابارلايدى Tasnim.

اگەنتتىكتىڭ حابارلاۋىنشا، يران يزرايل پرەمەرى بينيامين نەتانياحۋدىڭ وسىنىڭ الدىندا عانا جاريالاعان مالىمدەمەسىن «حالىقارالىق قاۋىپسىزدىك پەن بەيبىتشىلىككە قاۋىپ ءتوندىرۋشى» مالىمدەمە دەپ باعالاپ، حالىقارالىق قاۋىمداستىقتى نەتانياحۋدىڭ سوزىنە قاتىستى قاتاڭ شارا قابىلداۋعا شاقىردى. سونىمەن قاتار، ءيزرايلدىڭ حالىقارالىق ەرەجەلەردى اياق استى ەتۋىنە بايلانىستى الاڭداۋشىلىعىن ءبىلدىردى. تەھران بۇۇ ءيزرايلدى يادرولىق قارۋدى تاراتپاۋ تۋرالى كەلىسىمشارتقا قول قويۋعا ماجبۇرلەپ، يزرايلدىك يادرولىق باعدارلامانى اتوم ەنەرگياسى جونىندەگى حالىقارالىق اگەنتتىككە (International Atomic Energy Agency) مۇقيات زەرتتەۋدى ۇسىندى. ايتا كەتەيىك، يزرايلدىك Haaretz  باسىلىمىندا يزرايل پرەمەرى بينيامين نەتانياحۋدىڭ تامىز ايىنداعى «ەگەر كىمدە-كىم بىزگە قاۋىپ توندىرەتىن بولسا، ءبىزدىڭ تاراپىمىزدان دا ءدال سونداي قاۋىپ كەلەتىنىن ءبىلسىن» دەگەن مالىمدەمەسى جاريالانعان ەدى. باسىلىم، يزرايل پرەمەرى وسى ءسوزى ارقىلى ەلدىڭ يادرولىق پوتەنتسيالىن مەڭزەگەن دەپ توپشىلايدى. سونىمەن قاتار، يزرايل حالىقارالىق مىندەتتەمەلەردى بۇزىپ، يادرولىق قارۋ قولدانۋعا تىرىسادى دەپ ايىپتاعان ەدى. اتالعان ەكى ەل اراسىنداعى ەكىجاقتى قىرعيقاباقتىقتىڭ باستالعانىنا قانشا ۋاقىت وتسە دە ءالى ءبىر مامىلەگە كەلە الماۋدا. ماسەلەن، ۇستىمىزدەگى جىلدىڭ ءساۋىر ايىندا نەتانياحۋ يزرايلدە يراننىڭ اتومدىق باعدارلاماسىنىڭ  «اماد جوباسى» اتتى قۇپيا اسكەري بازاسى بولعانىن دالەلدەيتىن 100 مىڭنان استام تسيفرلى جانە قاعازدىق قۇجاتتاردىڭ بار ەكەنىن ايتقان ەدى. وسى ماسەلەدە، يزرايل يراننىڭ حالىقارالىق مىندەتتەمەلەردى بۇزىپ، يادرولىق باعدارلامالار تۋرالى مالىمەتتەرىن بولاشاقتا قولدانۋ ماقساتىندا جاسىرىپ قويعانىن مەڭزەگەننەن كەيىن يران تاراپى ونىڭ وسى مالىمدەمەسىنە قاتىستى داۋلى ءىس اشۋعا نيەتتەنىپ وتىر.

“The Qazaq Times”