فوتو: BBC

Brexit جوسپارى جۇزەگە اسپاي جاتىپ ۇلىبريتانيا بيلىگىنىڭ اراسىندا كيكىلجىڭنىڭ تۋىنا اكەپ سوقتى. كونسەرۆاتيۆتىك پارتيا دەپۋتاتتارى بۇل جوسپاردى جۇزەگە اسىرماۋ ءۇشىن تىرىسىپ باعۋدا. ولار ءتىپتى پرەمەر-مينيستر تەرەزا مەيدى بيلىكتەن كەتىرۋدى قاراستىرىپ جاتىر.

قارسى توپ پرەمەرگە سەنىمسىزدىك بىلدىرەتىن جولداۋدى دايىنداپ قويعان. ۆۆس تەلەارناسى ساراپتامالىق حابارلاردىڭ بىرىندە تەرەزا مەيدىڭ ەۋرووداقتان شىعۋ جايلى شەشىمىنىڭ مۇلدە سىن كوتەرمەيتىنى ايتىلدى. سول سەبەپتى ونىڭ ەلۋ شاقتى ارىپتەسى بىرلەسىپ مينيسترلەر كابينەتىنىڭ جەتەكشىسىن بيلىكتەن كەتىرۋ ءۇشىن «ساياسي ستسەناري» قۇراستىرىپ جاتىر. ولاردىڭ ويىنشا، مەيدىڭ «ماعىناسىز مالىمدەمەسى مەملەكەتتى قۇلدىراتادى».

داۋدىڭ باسى ارىدان باستالعان. بىرىككەن كورولدىك الداعى ون جىل ىشىندە ەۋرووداققا 40 ميللياردقا جۋىق ەۋرو تولەۋى ءتيىس. الدىڭعى اپتادا تەرەزا مەي «The Daily Telegraph» گازەتىندە جارىق كورگەن اۆتورلىق ماقالاسىندا برەكسيت شەشىمىن بۇگە-شىگەسىنە دەيىن تالقىلاي وتىرىپ، «ەكىنشى رەفەرەندۋمعا جول جوق. ەۋرووداق قۇرامىندا قالۋ-قالماۋ تۋرالى ماسەلە ەندى تالقىلانبايدى!»، – دەپ كەسىپ ايتقان. ول ءوز سوزىندە رەفەرەندۋمدى قايتا وتكىزىپ، ەلدەگى دەموكراتياعا قيانات جاساعىسى كەلمەيتىنىن مالىمدەدى. الايدا پارلامەنت دەپۋتاتتارى مەن بۇرىنعى سىرتقى ىستەر ءمينيسترى بوريس دجونسون مەيدىڭ ۇسىنىستارىن قاتتى سىنعا الدى جانە ەۋرووداقتان شىعۋ ءۇشىن تولەنەتىن 40 ملرد ەۋروعا قارسىلىقتارىن ءبىلدىردى. ولار تۇبىندە بريۋسسەل جەڭىسكە جەتىپ، چەكەرستە بولعان ۇسىنىستان سوڭ ۇلىبريتانيا ۇرىسقا اق جالاۋ جەلبىرەتىپ بارعانداي بولادى دەگەن ويدا.

ەسكە سالا كەتەيىك، Brexit-كە قاتىستى كەلىسسوزدەر وسى جىلدىڭ قاراشا ايىنا دەيىن جالعاسىن تابادى. ەگەر ەۋروپارلامەنت پەن ۆەستمينستەر اتالعان جوسپاردى ماقۇلداسا، ول كەلەسى جىلدىڭ ناۋرىزىندا تۇبەگەيلى جۇزەگە اسادى.

"The Qazaq Times"