قىتاي العاش رەتى اۋستراليانىڭ ەڭ اۋقىمدى تەڭىز اسكەري جاتتىعۋىنا قاتىستى

قىتاي العاش رەت اۋستراليانىڭ (اۆستراليانىڭ) ەڭ ءىرى اسكەري وقۋ-جاتتىعۋىنا قاتىستى. اۋستراليا ستراتەگيالىق Darwin ايلاعىنا جاقىن تەڭىز ايدىنىندا وتكىزىلىپ جاتقان كاكادۋ اسكەري جاتتىعۋىنا 27 ەلدەن 3000-نان استام جاۋىنگەر، 23 كەمە جانە سۋاستى قايىقتارى قاتىسۋدا. ونىڭ سىرتىندا اۋستراليانىڭ اۋە كۇشتەرى جاعىنان 21 ۇشاق قاتىستىرىلعان. بۇل تۋرالى  VOA جاڭالىقتار قىزمەتى حابارلادى.

بۇل قىتاي تەڭىز كۇشتەرىنىڭ العاش رەت اقش، اۋستراليا، جاڭا زەلانديا جانە كانادا اراسىنداعى جاتتىعۋعا قاتىسىپ، باسقا ەلدەرمەن تەڭىز قورعانىس سالاسىندا ىستەستىك ورناتۋعا مۇمكىندىك الىپ وتىر. ءارى، بۇل قىتاي-اۋستراليا اراسىنداعى شيەلەنىستىڭ كۇشەيە تۇسكەن كەزىنە تۋرا كەلدى.

اۋستراليانىڭ Royal تەڭىز پلوتىنا قاراستى نيۋكاسل فرەگاتىنىڭ كاپيتانى سەريكتىڭ ايتۋىنشا، اۋستراليالىق ەكى اسكەري لاۋازىمدى جاتتىعۋ كەزىندە قىتاي تەڭىز كۇشتەرىنە قاراستى «حۋاڭشان» فرەگاتىندا بولعان.

ءساۋىر ايىنىڭ سوڭىندا اۋستراليانىڭ ءۇش اسكەري كەمەسى وڭتۇستىك قىتاي تەڭىزىندە شارلاۋ جۇرگىزگەنى ءۇشىن قىتاي-اۋستراليا اراسىندا داۋ-داماي تۋىلعان ەدى. ال، مامىر ايىندا اقش قورعانىس مينيسترلىگى گاۆاي بىرلەسكەن اسكەري وقۋ-جاتتىعۋىنا قاتىسۋ ءوتىنىشىن قابىلداماي تاستاعان ەدى. ءارى، قىتايدىڭ وڭتۇستىك قىتاي تەڭىزىندەگى اسكەري ىقپالىن ارتتىرۋ ارەكەتتەرىن سىنعا العان بولاتىن.  بەيجىڭ جاق بۇل ايىپتاۋلاردى جوققا شىعارىپ كەلەدى.

ۇستىمىزدەگى جىلدىڭ باس شەنىندە، اۋستراليانىڭ باق-ى بارلاۋ اگەنتتىگىنىڭ ەسەبىن جاريالاپ، قىتاي كوممۋنيستىك پارتياسى كوپ جىلدان بەرى اۋستراليانىڭ نەگىزگى ساياسي پارتيالارىنا «ەندەپ كىرگەنىن» ايتقان بولاتىن. ەلدىڭ پرەمەر-ءمينيسترى ءوز كەزەگىندە، قىتاي تارابىنىڭ اۋستراليانىڭ ىشكى ىستەرىنە جاسىرىن ارالاسۋعا تىرىسقانىن سىنعا العان.

ەكى ەل اراسىنداعى كىربەڭدىك تەك بۇل عانا ەمەس. وسىدان بىرنەشە اپتا بۇرىن عانا، بەيجىڭ بيلىگى اۋستراليانىڭ ABC-ءدى (اۋستراليالىق حابار تاراتۋ كورپوراتسياسى) قىتاي زاڭدارىنا قايشىلىق جاسادى دەپ ايىپتاپ، ونىڭ قىتاي تەرريتورياسىنداعى ۆەب-سايتىنا، ۇيالى تەلەفونداعى قوسىمشالارىنا شەكتەۋ قويدى. بىراق، ABC تارابى جاساعان مالىمەتتە، قحر-نىڭ قانداي زاڭىن بۇزعانى تۋرالى ناقتى تۇسىنىك بەرمەگەنىن ايتتى.

“The Qazaq Times”