فوتو: Sputnik كازاحستان

كوكپاردان الەم چەمپيوناتى 2019 جىلى وزبەكستاندا وتەدى.

قىرعىزستان كوكپار فەدەراتسياسىنىڭ پرەزيدەنتى جىرعالبەك ساماتوۆتىڭ سوزىنشە، قىركۇيەك ايىنىڭ 8-ءى كۇنى وزبەكستان سپورت مينيسترلىگى مەن كوكپار فەدەراتسياسى ىستىقكولدە قىرعىزستان تاراپىمەن كەلىسسوزدەر وتكىزگەن. كەلىسسوزدەر بارىسىندا قوس تاراپ 2019 جىلى وزبەكستاندا كوكپاردان الەم چەمپيوناتىن وتكىزۋگە ۋاعدالاسقان.

ازىرگە الەم چەمپيوناتىنىڭ وزبەكستاننىڭ قاي قالاسىندا وتەتىندىگى بەلگىسىز. بىراق ءبىر بەلگىلىسى قىرعىزستان كوكپار فەدەراتسياسىنىڭ مالىمەتىنشە، الەم چەمپيوناتى قىرعىز كوكپارشىلارىنىڭ ەرەجەسى بويىنشا وتەتىن بولادى. ياعني سالىم قازاقستانداعىداي سىزىلعان جەڭبەردىڭ ىشىنە ەمەس، ارنايى جاسالعان تايقازانعا سالىنادى.

ەستەرىڭىزگە سالايىق، وتكەن اپتادا قىرعىزستاندا وتكەن ءىىى-دۇنيەجۇزى كوشپەندىلەرى ويىنىندا قازاقستان كوكپارشىلارى وزبەكستان قۇراماسىنان 4-5 ەسەبىمەن ۇتىلىپ، بۇنىڭ ارتى ۇلكەن داۋعا ۇلاسقان. قىرعىزستان كوكپارشىلارى قازاقستان تاراپىن «ويىندا ادەيى جەڭىلدى» دەپ ايىپتاپ، الەۋمەتتىك جەلىلەرگە ءتۇرلى ۆيدەولار جاريالاعان. كەيىننەن قازاقستان كوكپار فەدەراتسياسى قىرعىزستاندىق ارىپتەستەرىنىڭ بۇل مالىمدەمەسىنە جاۋاپ بەرگەن.

ءىىى-دۇنيەجۇزى كوشپەندىلەرى ويىنىندا كوكپاردان قىرعىزستان ءبىرىنشى ورىن، وزبەكستان ەكىنشى ورىن، قازاقستان ءۇشىنشى ورىن الدى. فينالدا قىرعىزستان قۇراماسى وزبەكستاندى 32-9 ەسەبىمەن ۇتسا، ءۇشىنشى ورىن ءۇشىن وتكەن ويىندا قازاقستان رەسەيدى 17-1 ەسەبىمەن تىزە بۇكتىرگەن.

"The Qazaq Times"