ناۋرۋ پرەزيدەنتى بارون ۆاكا (وڭنان ءبىرىنشى) قىتايلىق دەلەگاتسيا توبىن جيىننان قۋدى. فوتو: The Fiji Times.

ناۋرۋداعى تىنىق مۇحيت ارالدارىنىڭ فورۋمىنا قاتىسقان قىتاي دەلەگاتسياسى 4-ءشى سەرىكتەستەر ديالوگىندا فورۋم توراعاسى بولىپ وتىرعان ناۋرۋ پرەزيدەنتى بارون ۆاكامەن پىكىر قايشىلىعىنا كەلىپ قالىپ، جيىن ورتاسىندا فورۋمنان كەتىپ قالدى.

France-Presse اگەنتتىگىنىڭ حابارلاۋىنشا، سەيسەنبى كۇنگى وتىرىس كەزىندە، قىتايلىق وكىل كليماتتىڭ وزگەرۋىنە بايلانىستى ماسەلەنى تالقىلاۋعا تىرىسقاندىقتان پرەزيدەنت بارون ۆاكا جينالىستان شىعارىپ جىبەرۋگە ءماجبۇر بولعان.

فورۋم باستالۋدان بۇرىن، تايۋانمەن (تايۆان) ديپلوماتيالىق بايلانىستاعى ناۋرۋ قىتايلىق دەلەگاتسياعا ۆيزا بەرمەگەن. وسىعان بايلانىستى قىتايمەن تىعىز بايلانىستاعى كەيبىر ەلدەر ناۋرۋعا قىسىم تۇسىرگەن. ۆيزا ماسەلەسى فورۋم باستالعانعا دەيىن شەشىم تاپپاعان.

ناۋرۋ پرەزيدەنتى مالىمدەمەسىندە تۇسىنبەۋشىلىك بولعانىن اتاپ ءوتتى. ول سوزىندە ناۋرۋدىڭ قىتايمەن ديپلوماتيالىق بايلانىسى جوق ەكەنىن، تاراپتار ۇزاق ۋاقىتتان بەرى بالاما كەلىسىمدەر جاساسىپ كەلگەنىن، قىتاي دەلەگاتسياسى ناۋرۋ تارابىنىڭ ايرىقشا كەڭشىلىگىمەن فورۋمعا قاتىسىپ وتىرعانىن ايتىپ وتكەن. سەبەبى، ەكى ەل اراسىندا ديپلوماتيالىق بايلانىستىڭ جوق بولسا دا، ناۋرۋ تارابى قىتاي دەلەگاتسيا مۇشەلەرىنە ۆيزا بەرگەنىن العا تارتتى.

دەگەنمەن، سەيسەنبى كۇنى تۇستەن بۇرىن فورۋم مۇشەلەرى مەن 18 ديالوگ سەرىكتەستەر اراسىندا قىزۋ پىكىرتالاس جۇرگىزىلگەن. قىتاي اتالعان فورۋمنىڭ مۇشەسى ەمەس، بىراق، 18 ديالوگ سەرىكتەسىنىڭ ءبىرى.

كەزەكتى فورۋم ناۋرۋداعى «ناۋرۋ مادەني ورتالىعىندا» ءوتتى. ەڭ قىزىعى، ناۋرۋداعى تايۋان ەلشىلىگى دە سول عيماراتتا ورنالاسقان. ناۋرۋ تىنىق مۇحيتتاعى شاعىن ەل بولعانىمەن اۋستراليانىڭ (اۆستراليا) زور قولداۋىنا يە ەل. سونداي-اق، تايۋاننىڭ دا ماڭىزدى سەرىكتەسى سانالادى.

“The Qazaq Times”