بريتانيا ءسىم: رەسەيگە قارسى سانكتسيالاردى تەزىرەك جۇزەگە اسىرۋ كەرەك

ۇلىبريتانيا سىرتقى ىستەر ءمينيسترى دجەرەمي حانت ەكس-تىڭشى سەرگەي سكريپال مەن قىزى يۋليا سكريپالدىڭ ۋلانۋىنا بايلانىستى رەسەيگە قارسى قاتاڭ سانكتسيالاردى تەز ارادا سالۋ كەرەكتىگىن ايتتى. بۇل تۋرالى BBC تىلشىلەرى حابارلايدى.

وسى اپتادا بريتاندىق پارلامەنتتە ءسوز سويلەگەن حانت اقش-تىڭ قاراشا ايىندا ءوز كۇشىنە ەنەتىن سانكتسياسىن نەگىزگە الا وتىرىپ، ەۋروپا دا قاراپ قالماۋى كەرەكتىگىن ەسكەرتتى. رەسەي قانشا جەردەن بۇل ءىستى مويىنداماسا دا، سكريپالدىڭ اسا قاۋىپتى حيميالىق «نوۆيچوكتان» ۋلانعانى ءبىزدىڭ سوزىمىزگە دالەل بولادى دەيدى.

حانت ءوز سوزىندە «مەنىڭشە، سولسبەري اكتسياسى مەن اتىشۋلى سكريپال ىسىنە قاتىستى ماسەلەدە قول قۋسىرىپ وتىرماۋىمىز قاجەت. حيميالىق قارۋ قولدانعانى ءۇشىن رەسەيمەن بايلانىستى شەكتەپ، بارىنشا «قىزىل شەكارا» ورناتقانىمىز ءجون. بۇل رەتتە سانكتسيانى تولاسسىز سالىپ وتىرعان امەريكادان ۇلگى الۋىمىز كەرەك دەپ ەسەپتەيمىن»، – دەگەن. ەۋرووداقتىڭ الەمدىك ليدەرلەرى دە ەكى ەلدىڭ شەشىمىن قۇپتايدى.

سونداي-اق، دجەرەمي حانت وسى ۋاقىتقا دەيىنگى قارىم-قاتىناستاردى ەسكەرە وتىرىپ، ماسكەۋمەن بىرجاقتى كەلىسىمدى توقتاتپاۋىمىز مۇمكىن دەدى. الايدا، رەسەيدى پۋتين باسقارىپ وتىرعان كەزدە بريتانيانىڭ ماسكەۋمەن بۇرىنعىداي جاقىنداسا المايتىنىن دا ەسكەرتتى.

ەستەرىڭىزگە سالا كەتەيىك، ناۋرىز ايىندا بريتاندىق سولسبەري قالاسىندا سەرگەي سكريپال مەن قىزى حيميالىق قارۋدان ۋلانعان. ءبىراز ۋاقىت رەسەيلىك بارلاۋشى بولعان سكريپال كەيىن ۇلىبريتانيا جاعىنا اۋىسقان. سول سەبەپتى، اقش پەن ۇلىبريتانيا بۇل قاستاندىققا رەسەيدى ايىپتادى. الايدا، كرەمل بۇل ايىپتى ءالى كۇنگە دەيىن مويىنداعان جوق.

وسىدان بىرنەشە كۇن بۇرىن فەدەرالدى رەگيستردە قۇراما شتاتتاردىڭ رەسەيگە سالىناتىن سانكتسيالارىنىڭ سيپاتى جاريالانعان. اتاپ ايتساق، رەسەيدىڭ سىرتقى جاعدايىن دامىتۋعا، قارۋ-جاراق ساۋداسىنا قولداۋ كورسەتۋگە جانە قارجىلاندىرۋعا، وزگە دە تاۋارلار مەن تەحنولوگيالاردى ەكسپورتتاۋعا تىيىم سالىنادى.

ەكى الپاۋىت مەملەكەتتىڭ ويى مەن ءىسى ءبىر ارنادا توعىسىپ، رەسەيگە قاۋىپ ارتا ءتۇستى. سۇراپىل سانكتسيالار سانى دا جاڭارىپ كەلەدى. دەمەك، جاقىن ارادا رەسەيدە ادەتتەگىدەي نارازىلىق ءورشىپ، وليگارحتار مەن فيرما قوجايىندارى «قوڭىز تەرىپ كەتەدى». دالەل-دايەكتىڭ كوپتىگىنە قاراماستان بۇل ىسكە بارىنشا نازار اۋدارماۋعا تىرىسىپ باققان بىرجاقتى پوزيتسياداعى رەسەي وسى جولى «سۇتتەن اق، سۋدان تازا» بوپ شىعا الا ما؟..

"The Qazaq Times"