ەكى كورەيا باسشىسىنىڭ ەكىنشى رەتكى كەزدەسۋى. فوتو: VOA.

وڭتۇستىك كورەيا پرەزيدەنت سارايىنىڭ حاتشىسى بۇگىن تاڭەرتەڭ رەسمي مالىمدەمە ارقىلى اقش پەن سولتۇستىك كورەيانىڭ يادرولىق قارۋسىزداندىرۋ جونىندەگى كەلىسسوزدى قايتا باستاۋعا شاقىردى. بۇل تۋرالى Yonhap اگەنتتىگى حابارلادى.

بۇعان قوسا مالىمدەمەدە، وڭتۇستىك كورەيا پرەزيدەنتىنىڭ سولتۇستىك كورەيا ماسەلەسى بويىنشا ارنايى وكىلى سارسەنبى كۇنى پيوڭياڭعا (پحەنيان) ساپارلاي بارىپ، وڭتۇستىك-سولتۇستىك كورەيا باسشىلارىنىڭ وسى ايدا وتەتىن ءۇشىنشى رەتكى ءسامميتى تۋرالى كەڭەسەتىنى ايتىلدى.

وڭتۇستىك كورەيا پرەزيدەنتى ءمۇن جاين (Moon Jae-in) ءوزىنىڭ ارنايى وكىلىنىڭ پيوڭياڭ ساپارى اقش مەملەكەتتىك حاتشىسى پومپەونىڭ ساپارىنا جول اشادى جانە ەكى ەل اراسىنداعى كەلىسسوز كەدەرگىلەرىن جەڭىلدەتەدى دەپ ۇمىتتەنەتىنىن جەتكىزگەن.

بۇگىنگى مالىمدەمەدە: «ديپلوماتيانىڭ قازىرگىدەي الماعايىپ جاعدايىندا، قۇراما شتاتتىڭ ستراتەگيالىق توزىمدىلىك تانىتۋى مەن ماقۇلداۋى بولماسا كورەي تۇبەگىندەگى تاريحي وزگەرىستەردى قولعا كەلتىرۋ مۇمكىن ەمەس»، – دەلىنگەن.

ەستەرىڭىزدە بولسا، وتكەن اپتادا اقش مەملەكەتتىك حاتشىسى پومپەونىڭ سولتۇستىك كورەيا ساپارى ترامپتىڭ مالىمدەمەسىنەن كەيىن كۇشىنەن قالدىرىلدى. پرەزيدەنت ترامپ كەيىن تۆيتتەر پاراقشاسىنداعى مالىمدەمەسىندە، سولتۇستىك كورەيانىڭ اقش-پەن كەلىسسوز جۇرگىزۋ كەزىندە قىتاي جاعىنان قاتتى قىسىم كورگەنىن، وعان قوسا بەيجىڭ بيلىگى سولتۇستىك كورەيا استىرتىن  كومەك تە كورسەتكەنىن ايتتى. ول جانە سوزىندە «قىتاي كومەگىنىڭ قالىپتاسقان جاعدايعا كومەگى جوق» دەگەن بولاتىن.

بۇعان بەيجىڭ تارابى دا قارسى مالىمدەمە جاساپ، ترامپتىڭ ايىپتاۋلارىن تەرىستەدى. ءارى، ەكى ەل اراسىنداعى كەلىسپەۋشىلىككە كىناسىز ەكەندىكتەرىن ايتىپ اقتالىپ، ترامپقا كەلىسپەۋشىلىك ءۇشىن باسقالاردى كىنالاماۋعا شاقىرعان بولاتىن.