قىتايدىڭ ابە ساياساتىنان الاڭدايتىنى قالاي: جاپون باس ءۋازىرى قازاندا قىتايعا ساپارلاماق

جاپونيانىڭ باس ءۋازىرى (پرەمەر-ءمينيسترى) شينزو ابە (سيندزو ابە) جەكسەنبى كۇنى مالىمدەمە جاساپ، الداعى ايدا بيلەۋشى ليبەرال-دەموكراتيالىق پارتياسىنىڭ پارتيا جەتەكشىسى سايلاۋىنا قاتىساتىنىن مالىمدەدى. سونىمەن بىرگە، قىركۇيەكتەگى سايلاۋدا شينزو ابە جەڭىسكە جەتىپ، جالعاستى پارتيا جەتەكشىسى جانە باس ءۋازىر بولىپ بيلىك ۇستايدى دەپ كۇتىلۋدە.

ابە جاپونيانىڭ وڭتۇستىك-باتىسىنداعى ارالدارعا بارعاندا جاساعان مالىمدەمەسىندە: «مەن ليبەرال-دەموكراتيالىق پارتيانىڭ جەتەكشىسى جانە ەلدىڭ پرەمەر-مينيسترلىگىن جالعاستى اتقارۋعا شەشىم قابىلدادىم. الداعى ءۇش جىلدا جالعاستى جاپونيا ۇكىمەتىنە جەتەكشىلىك ەتەتىن بولام»، – دەگەن.

شينزو ابە 2012 جىلى باس ۋازىرلىككە قايتا ورالعان بولاتىن. ول بيلىكتەگى جىلدارىندا «Abenomics» ساياساتىن تۇراقتى كوتەرۋ جانە ۇلتتىق قورعانىستى نىعايتۋ قاتارلى ساياساتتاردى بەرىك ۇستانۋمەن ەرەكشەلەندى. ول جانە جاپونيانىڭ قورعانىس كۇشتەرىنىڭ مارتەبەسىن ايقىنداۋ ءۇشىن كونستيتۋتسيانىڭ 9-شى بابىنا وزگەرىستەر ەنگىزگەن.

ابەنىڭ بۇل قادامدارى قىتاي بيلىگىن الاڭداتتى. بەيجىڭ تارابى ابەنىڭ كونستيتۋتسيالىق وزگەرىستەرى ەكىنشى دۇنيەجۇزىلىك سوعىستان كەيىنگى بەيبىتشىلىك كونستيتۋتسياسىنا وزگەرىس ەنگىزۋى جانە جاپون ارمياسىنىڭ مارتەبەسىن كوتەرۋ، ءوز كەزەگىندە بۇل قىتاي مەن ايماقتىڭ قاۋىپسىزدىگىنە قاتەر توندىرەدى دەپ الاڭدايدى. ونىڭ ۇستىنە قىتايلىق باق ابەنىڭ باسقان-تۇرعانىن اڭدىپ، سىناپ-مىنەۋگە ادەتتەنىپ قالعان. ءبىر سوزبەن ايتقاندا قىتاي قوعامىندا ابە ساياساتىنا قارسىلىق جاپونياعا تاريحي كوزقاراستىڭ جاڭا زامانداعى كورىنىسى بولىپ قالىپتاسىپ قالدى.

شينزو ابە ۇكىمەتى بۇل ايىپتى جوققا شىعارادى جانە جاپونيا قاۋىپسىزدىكتى قورعاۋ كۇشتەرىنىڭ ناشارلاۋىنا بايلانىستى ەل قاۋىپسىزدىگىن قامتاماسىز ەتۋ ماقساتىندا قارۋلى كۇشتەردى دامىتۋ قاجەت ەكەنىن العا تارتادى.

جاپوننىڭ باس ءۋازىرى قىتايمەن اراداعى قارىم-قاتىناستى جاقسارتۋ ءۇشىن بىرنەشە رەت تالپىنىس جاساعان. الدا، قازان ايىندا وسى ماقساتتا بەيجىڭگە ساپارلاي بارۋدى دا جوسپارلاپ وتىر. دەگەنمەن، شينزو ابە ءوزىنىڭ قىتاي ساپارىنان بۇرىن پارتيا جەتەكشىسىنىڭ سايلاۋىندا جەڭىپ، جاپونيا ۇكىمەتىنىڭ تىزگىنىن قولىنا الۋى كەرەك.

جاپونداردىڭ ابەنى قولداۋ كورسەتكىشى تىم جوعارى ەمەس. سولاي دا، وزگە وپپوزيتسيالىق پارتيالاردان كوش ىلگەرى. كوپتەگەن ساراپشىلار ابەنىڭ بيلىكتى ءوز قولىنا الۋ ىقتيمالدىعى جوعارى دەپ قارايدى.

“The Qazaq Times”