تاليبان ۇيىمى دا ماسكەۋدىڭ كەلىسسوز ۇستەلىنە بارمايتىن بولدى

وسىدان بۇرىن اۋعانستاننىڭ سىرتقى ىستەر مينيسترلىگى 4 قىركۇيەك كۇنى ماسكەۋدە وتەتىن بەيبىتشىلىك كەلىسسوزىنە قاتىسپايتىنىن حابارلاعان ەدى. ىلە-شالا تاليبان كۇشتەرى دە رەسمي مالىمدەمە جاساپ، ماسكەۋدەگى كەلىسسوزگە بارمايتىنىن ايتتى. بۇل تۋرالى «انادولى» اقپاراتتىق اگەنتتىگى حابارلادى.

اۋعانستان سىرتقى ىستەر مينيسترلىگىنىڭ مالىمدەمەسىندە: «ءبىز كەلىسسوزگە قاتىسپاۋ تۋرالى شەشىم قابىلدادىق. ەگەر تاليبانمەن كەلىسسوز جۇرگىزۋ كەرەك بولسا ونى ءبىز شەتەلدىكتەردىڭ قاتىسۋىنسىز دا جۇزەگە اسىرامىز»، – دەدى.

اۋعانستان ۇكىمەتىنىڭ مالىمدەمەسىنەن كەيىن تاليبان جاعى دا مالىمدەمە جاساپ: «رەسەيدىڭ بەيبىتشىلىك كەلىسسوزگە شاقىرۋىن قابىلدامايمىز»، – دەستى. بۇعان دەيىن كەلىسسوزگە تاليبان ۇيىمىنىڭ 4 وكىلى قاتىساتىنى بەلگىلى بولعان ەدى.

ماسكەۋ جاق قۇراما شتاتتى قامتىعان 12 ەلدى كەلىسسوز ۇستەلىنە شاقىرعان بولاتىن.

“The Qazaq Times”