سولتۇستىك كورەيا بۇۇ قاۋىپسىزدىك كەڭەسىن كوزگە ىلەر ەمەس

7 اقپان، بۇۇ قاۋىپسىزدىك كەڭەسى جانىنداعى سولتۇستىك كورەياعا قاراتىلعان سانكتسيا كوميتەتى، سولتۇستىك كورەيانىڭ سانكتسيا شارتتارىن بۇزۋ ىستەرىنىڭ تەكسەرۋ قورتىندىسىن جاريالادى. بۇل تۋرالى قىتايدىڭ news.sina  سايتى حابارلاپ وتىر.

وتكەن جىلى ەگيپەت تەڭىز ايلاعىنداعى اسكەري كەمەدەن سولتۇستىك كورەيانىڭ قارۋى تابىلعان. بۇل مىسىردىڭ وق-دارىلەر اراسىنداعى ەڭ قۋاتتىسى بولىپ تىركەلگەن. جاپونيا كيودو اقپارات ورتالىعى 8 اقپانداعى حابارىندا، سولتۇستىك كورەيا سانكتسيالاردان جالتارۋدىڭ امالىن تاۋىپ، قارۋ-جاراقتى دامىتۋدى اۋقىمدى تۇردە جالعاستىرۋدا دەدى. ازىرگە دەيىن بۇل قارۋلاردىڭ ناقتى ماقساتى مەن قولدانۋ باعىتى ايقىن ەمەس. كيودو اقپارات ورتالىعىنىڭ ايتىسىنا قاراعاندا، قاۋىپسىزدىك كەڭەسىنىڭ سولتۇستىك كورەياعا سالعان سانكتسياسىندا قارۋ-جاراق ەكسپورتتاۋىنا تولىقتاي شەكتەۋ قويىلعان. دەگەنمەن، يادرولىق قارۋ مەن بالليستيكالىق زىمىرانداردى دامىتۋ ءۇشىن  قارۋ-جاراق ساۋداسىن جاساپ وتىر دەۋگە بولادى.

مىسىر كەمەسىندە تابىلعان قارۋلار اراسىندا ءپورتاتيۆتى زىمىران دا كەزدەسەدى. مىسىرلىق ۇكىمەت بۇل تابىلعان قۋاتتى قارۋلاردان جالتارىپ، مىسىرمەن ەش قاتىسسىز دەپ مالىمدەدى. ال جاپوندىق كيودو اقپارات ورتالىعى بۇل قارۋلار مىسىردان سىرت، ءسۇريا (سيريا) مەن افريكا ەلدەرىنە تاسىمالدانعان بولۋى مۇمكىن دەيدى. سول ەلدەرمەن ارناۋلى كەلىسىم جاسالعان دەگەن بولجامداردى دالەلدەپ باعۋدا.

سولتۇستىك كورەياعا قاتىستى قارۋ-جاراق ساۋداسى 2009 جىلدان باستاپ بەلگىلى بولعان.  سول كەزدە بانگكوك اۋەجايىندا سولتۇستىك كورەيا وندىرگەن ءپورتاتيۆتى زىمىراندار تاركىلەنگەن ەدى. ونىڭ اراسىندا تانككە قارسى زىمىراندار دا بار. قارۋ-جاراقتىڭ جالپى سالماعى 35 توننانى قۇرايدى.

كيدو جاريالاعان حاباردا سولتۇستىك كورەيانىڭ سانكتسيادان جالتارۋى بارعان سايىن ۇدەپ كەلەتىنىن ايتتى. ءتىپتى، سانكتسيالاردان جالتارۋ ماقساتىندا كورەي بانكتەرى مەن شەتەلدىك اگەنتتىكتەردى دە پايدالانۋدى كەڭەيتكەن. الەمدەگى ءبىر توپ قارجى توپتارمەن اقشا اۋدارىمى ءۇشىن كەلىسىمدەرگە شاقىرعان. قازىرگى كەزدە سولتۇستىك كورەي ەكسپورتى رەتىندە مينەرالدىق رەسۋرستار، كومىردەن تىس تيىم سالىنعان قارۋ-جاراق ەكسپورتىن قۇراپ وتىر.

كورەيانىڭ وتكەن جىلى جاساعان ەكى رەتكى يادرولىق سىناعى مەن بىرنەشە رەتكى بالليستيكالىق زىمىران سىناعى ءۇشىن، بۇۇ قاۋىپسىزدىك كەڭەسى سانكتسيالاردى ەكى مارتە كۇشەيتكەن بولاتىن. اتالعان ماسەلەمەن ارناۋلى اينالىسىپ كەلە جاتقان ماماندار، بۇل سانكتسيالاردىڭ ءالى دە جەتىمسىزدىگىن، كەڭەس مۇشەلەرى جۇمساقتىق تانىتىپ وتىر دەپ ايىپتادى.

سولتۇستىك كورەيا يادرولىق ماسەلەسى – الەمدەگى ەڭ داۋلى ماسەلە. كورەيا مەن ساياسي قايشىلىقتاعى جانە كورشىلەس مەملەكەتتەر وزدەرىنە تونەتىن يادرولىق قاۋىپتى ازايتۋ ءۇشىن بۇۇ قاۋىپسىزدىك كەڭەسىنە جۇگىنەدى. بىراق، قاۋىپسىزدىك كەڭەسى سالعان سانكتسيالاردان جالتارىپ، قارۋ-جاراق ەكسپورتىن بارعان سايىن كەڭەيتىپ وتىرعان كورەياعا الدا قاتاڭ جازا قولدانۋى مۇمكىن. حالىقارادا ەش ءبىر  ەلدىڭ قاباعىنا قاراپ سويلەگىسى كەلمەيتىن بۇل ەل، جازاعا قارسى سوعىس قوزعاۋى دا ابدەن مۇمكىن. ونداعى سەنەتىنى – وزدەرىندەگى يادرولىق وق تۇمسىقتار. يران يادرو ماسەلەسى دە قايتا ۋشىعۋعا بەت الدى. بۇل جىل حالىقارالىق يادرولىق ماسەلەدەگى داۋ-دامايعا تولى جىل بولارى انىق.

“The Qazaq Times”