اۋعانستان بيلىگى تالىبتەرمەن كەلىسسوز جاساۋدان باس تارتتى

اۋعانستاننىڭ سىرتقى ىستەر مينيسترلىگىنىڭ ءباسپاسوز حاتشىسى اۋعان ۇكىمەتىنىڭ تاليبان قوزعالىسىنىڭ وكىلدەرىمەن ماسكەۋدە وتەتىن بەيبىت كەلىسسوزدەرگە دەلەگاتسيا جىبەرمەيتىنىن مالىمدەگەن. اۋعانستان ءسىم وزدەرىنىڭ بۇل شەشىمدەرىن بەيبىت كەلىسسوزدىڭ باستاماشىسى رەتىندە كرەمل ەمەس، اۋعان ۇكىمەتى شىعۋى ءتيىس دەپ سانايتىندىعىمەن تۇسىندىرگەن. بۇل تۋرالى «abhaber.com» حابارلايدى.

بۇدان بۇرىن رەسەي فەدەراتسياسىنىڭ سىرتقى ىستەر مينيسترلىگى بەيبىت كەلىسسوز وتكىزۋ تۋرالى ۇسىنىس جاساپ، تاليبان قوزعالىسىنىڭ وكىلدەرىن دە شاقىرعان ەدى. ەسكە سالايىق، 20 تامىز كۇنى اۋعانستان پرەزيدەنتى اشراف عاني تاليبان قوزعالىسىمەن اراداعى قاقتىعىستى توقتاتۋ تۋرالى حابارلاعان. بۇنداي ۇسىنىس گازني قالاسىنداعى قاندى قاقتىعىستان كەيىن كوتەرىلگەن بولاتىن. اۋعانستاننىڭ ۇكىمەتتىك كۇشتەرى ەلدىڭ شىعىسىنداعى قالانىڭ اۋقىمدى بولىگىن ءوز باقىلاۋىنا العانىن حابارلاعان ەدى. دەگەنمەن، قاشاننان-اق، تالىبتەرمەن مامىلەگە كەلۋگە مۇددەلىلىك تانىتىپ كەلە جاتقان بيلىكتىڭ، اتالعان كەلىسسوزدەردىڭ كرەملدە وتەتىنىنە بولا، مۇنداي مۇمكىندىكتەن باس تارتىپ وتىرعانى تاڭقالدىرادى.

“The Qazaq Times”