گەرمانيا كانتسلەرى انگەلا مەركەل رەسەي پرەزيدەنتى ۆلاديمير ءپۋتيندى قابىلدادى دەپ حابارلايدى BBC اقپارات اگەنتتىگى. ءۇش ساعاتقا سوزىلعان كەزدەسۋ بارىسىندا ەكى ەل باسشىسى يران، ءسۇريا، ۋكراينانىڭ شىعىسىنداعى جاعدايدى جانە «سولتۇستىك اعىس – 2» جوباسىن تالقىلاعان.

كەزدەسۋگە دەيىن ا.مەركەل اقپارات قۇرالدارىنا بەرگەن سۇحباتىندا ۋكراينا، ءسۇريا ماسەلەسىنەن بولەك، ەكى ەل اراسىنداعى قارىم-قاتىناس پەن مينسك كەلىسىمشارتىنا توقتالاتىنىن ايتقان.

ەڭ العاش پۋتين مەركەلمەن 2014 جىلى گەرمانيادا كەزدەسكەن. وسى جولى مەركەلدىڭ قابىلداۋىندا بولعان پۋتين بەرليندەگى مەزيبەرگ رەزيدەنتسياسىندا «سولتۇستىك اعىس – 2» جوباسىنا باسىمدىق بەردى.

بالتىق ارقىلى گەرمانياعا رەسەي گازىن تاسىمالداۋدى رەتتەيتىن «سولتۇستىك اعىس – 2» جوباسىنىڭ ءمانى ەكونوميكالىق تۇرعىدا ايرىقشا. سول سەبەپتى مەركەل اتالعان جوبانىڭ ارى قاراي جانداناتىنىنا كەپىلدىك بەردى.

اقش پەن ۋكراينا «سولتۇستىك اعىس – 2» جوباسىن قولدامايدى، ساياسي استار ىزدەيدى. ولاردىڭ ويىنشا، الداعى ۋاقىتتا گەرمانيا رەسەيدىڭ ەنەرگەتيكالىق قۋات كوزدەرىنە تىكەلەي تاۋەلدى مەملەكەتكە اينالۋى مۇمكىن. ال ۋكراينا گاز تاسىمالىندا ىشتەي كەدەرگىگە ۇشىراپ، ىشكى نارىق السىرەيدى دەپ سانايدى. الايدا، گەرمانيا كانتسلەرى انگەلا مەركەل اتالعان جوبا ارقىلى ساياسي كوزقاراس ەمەس، جۇيەلى ەكونوميكالىق قارىم-قاتىناستى دامىتاتىنىن ايتتى.

سونداي-اق، ولار سۇرياداعى ۇزدىكسىز قاقتىعىستاردى توقتاتۋعا باعىتتالعان ءىس-ارەكەتتەرىن ۇزبەۋگە كەلىسكەن.

"The Qazaq Times"