ورتالىق كوممۋنيكاتسيالار قىزمەتىندە ەلەكتروندىق ەڭبەك شارتتارىن ەنگىزۋ ماسەلەلەرى بويىنشا پرەسس-كونفەرەنتسيا ءوتتى. ەلىمىزدە ەلەكتروندى ەڭبەك شارتتارى جيناقتالاتىن جۇيە ەنگىزىلەدى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى ناريمان مۇقىشەۆ ايتتى.

جۇيە ەنگىزىلسە قىزمەتكە ورنالاساتىن ادامدار بۇرىنعىداي قۇجات جينامايدى. تەك ەلەكتروندى قولتاڭبانىڭ بولعانى جەتكىلىكتى. جۇمىس بەرۋشى بارلىق قاجەتتى اقپاراتتى جۇيەگە كىرىپ، ءوزى قاراي الادى. جوبا ازىرلەۋشىلەرىنىڭ ايتۋىنشا، مۇنداي جاڭاشىلدىق جالعان قۇجات اينالىمى مەن قاعازباستىلىقتى ەداۋىر ازايتادى.

جوبانىڭ  نەگىزگى ماقساتى -  حالىققا كورسەتىلەتىن قىزمەتتەر ساپاسىن ارتتىرۋ. جانە ازاماتتاردى جۇمىسقا ورنالاستىرۋدىڭ قولايلى بولۋى. بىرىنشىدەن، ەلەكتروندى ەڭبەك شارتتارىن ەنگىزۋ جۇمىسكەرلەر ءۇشىن جۇمىسقا ورنالاسۋ پروتسەسىن جەڭىلدەتەدى. قاعازداردى جيناۋدىڭ قاجەتى بولماي كەز-كەلگەن ءىس اۆتوماتى تۇردە جاسالىنادى.

“The Qazaq Times”