تۇركيا پرەزيدەنتى رەجەپ تايىپ ەردوعان مەن رەسەي باسشىسى ۆلاديمير پۋتين تەھراندا كەزدەسەتىن بولدى – دەپ حابارلايدى يزۆەستيا گازەتى.

باسىلىم مالىمەتىنشە، ەردوعان مەن پۋتين يران استاناسىندا رەسەي، تۇركيا جانە يران باسشىلارىنىڭ ءسامميتى اياسىندا كەزدەسەدى. كەزدەسۋ بارىسىندا قوس تاراپ ەكى جاقتىق قارىم-قاتىناس، ساۋدا-ەكونوميكالىق بايلانىس جانە ءسۇريا داعدارىسى جونىندە كەلىسسوزدەر جۇرگىزەدى دەپ كۇتىلۋدە.

ەستەرىڭىزگە سالايىق، بۇعان دەيىن رەجەپ تايىپ ەردوعان رەسەي، تۇركيا، يران ۇشتىگىنىڭ ءسامميتى 7 قىركۇيەك كۇنى ستامبۇل قالاسىندا وتەدى دەپ مالىمدەگەن. بىراق كەيىننەن ونىڭ بۇل مالىمدەمەسىن رەسەي پرەزيدەنتىنىڭ ءباسپاسوز حاتشىسى دميتري پەسكوۆ جوققا شىعارعان.

جالپى، قازىرگى تاڭدا رەسەي، تۇركيا جانە يراننىڭ ەكونوميكالىق جاعدايى كۇن وتكەن سايىن ناشارلاۋدا. وعان باستى سەبەپ اقش-تىڭ اتالمىش مەملەكەتتەرگە سالعان سانكتسيالارى. اقش سانكتسيالارىنىڭ سالدارىنان سوڭعى ءبىر اپتادا دوللار الدىندا تۇركيا ليراسى 40 پايىزعا، رەسەي ءرۋبلى 9,33 پايىزعا قۇنسىزدانعان.

"The Qazaq Times"