قازاقستاندا ساقتاندىرۋ شارتتارى 2019 جىلدىڭ 1 قاڭتارىنان باستاپ ونلاين رەجيمدە جاسالاتىن بولادى. بۇل تۋرالى ۇلتتىق بانكتىڭ ءباسپاسوز قىزمەتى حابارلادى. 

2019 جىلعى 1 قاڭتاردان باستاپ ساقتاندىرۋ ۇيىمدارىنىڭ تۇتىنۋشىلارى ساقتاندىرۋ شارتتارىن ينتەرنەت-رەسۋرستاردى پايدالانا وتىرىپ، ەلەكتروندىق نىساندا جاساپ، ساقتاندىرۋ ءپوليسىن ەلەكتروندىق نىساندا راسىمدەي الادى. شارتتىڭ ەلەكتروندىق نۇسقاسى ساقتاندىرۋدىڭ بارلىق تۇرلەرى بويىنشا ەنگىزىلەدى.

ونلاين-ساقتاندىرۋ ەنگىزىلگەننەن باستاپ مىندەتتى ساقتاندىرۋ شارتتارى بويىنشا قاعازداعى پوليستەردىڭ اينالىسى جويىلادى. ساقتاندىرۋ شارتىن جاساۋ فاكتىسى ساقتاندىرۋ بويىنشا بىرىڭعاي دەرەكقورعا سۇراتۋ جىبەرۋ ارقىلى تەكسەرىلەدى. مىسالى، اۆتوكولىك يەلەرىنىڭ اكىمشىلىك پوليتسيانىڭ قىزمەتكەرلەرىنە ساقتاندىرۋ ءپوليسىن ۇسىنۋى قاجەت ەمەس.

ونلاين-ساقتاندىرۋدى ەنگىزۋ حالىق پەن بيزنەس ءۇشىن ساقتاندىرۋدىڭ قۇنىن ارزانداتۋعا، شارتتاردى وفيسكە بارماي-اق نەمەسە دەلدالداردىڭ قاتىسۋىنسىز ساقتاندىرۋ كومپانيالارىنىڭ ينتەرنەت-رەسۋرستارى ارقىلى تىكەلەي جاساۋ مۇمكىندىگىن بەرەدى، سونداي-اق ساقتاندىرۋ تولەمدەرىن الۋدى جەدەلدەتەدى.

ايتا كەتەيىك، ساقتاندىرۋ كومپانيالارى كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ شارتتارىن ەلەكتروندىق نىساندا جاساۋ كەزىندە 10%-عا دەيىن جەڭىلدىك بەرۋگە قۇقىلى.

“The Qazaq Times”