تۇركيا پرەزيدەنتى رەجەپ تايىپ ەردوعان حالقىن التىن مەن شەتەلدىك ۆاليۋتانىڭ ءبارىن تۇرىك ليراسىنا اۋىستىرۋعا شاقىردى، - دەپ حابارلايدى «A Haber».

«دوللار، ەۋرو نەمەسە التىندارىڭ بار بولسا، ءبارىن تۇرىك ليراسىنا اينالدىرىڭدار. بۇل — ۇلتتىق ىشكى كۇرەس. بۇل — بىزگە ەكونوميكالىق سوعىس جاريالاعاندارعا قارسى جاۋاپ» ،  - دەپ مالىمدەگەن پرەزيدەنت ەردوعان.

ايتا كەتۋ كەرەك، وسىدان بۇرىن اقش پرەزيدەنتى دونالد ترامپ تۇركيادان شىعارىلاتىن بولات پەن اليۋميني سالىعىن ەكى ەسەگە ارتتىرعان ەدى. جاڭا تاريفتەر اليۋمينيگە قاتىستى — 20%، بولاتقا — 50%-ءتى قۇرايدى.

«مەن جاڭا عانا تۇركيادان ەكسپورتتالاتىن اليۋميني مەن بولاتقا سالىناتىن تاريفتەردى ەكى ەسەگە ارتتىرۋعا بۇيرىق بەردىم. ولاردىڭ ۆاليۋتاسى — تۇرىك ليراسى ءبىزدىڭ مىقتى دوللارىمىزبەن سالىستىرمالى تۇردە وتە قاتتى قۇلدىراۋدا!» ، - دەپ مالىمدەگەن د.ترامپ ءوزىنىڭ «Twitter»-دەگى پاراقشاسىندا.

بۇدان بۇرىن دا حابارلاعانىمىزداي, تۇركيا پرەزيدەنتى رەجەپ تايىپ ەردوعان اقش-تىڭ وسى ارەكەتىنە قارسى ءۇنسىز قالا المايتىنىن مالىمدەگەن ەدى. الايدا، انكارا بيلىگىنىڭ ناقتى قانداي شەشىمدەرگە باراتىنى ازىرگە بەلگىسىز.

بارىمىزگە دە بەلگىلى، 1 تامىز كۇنى، اقش اكىمشىلىگى تۇركيا ءسىم ءمينيسترى سۇلەيمەن سويلۋ مەن ادىلەت ءمينيسترى ءابدۇلحاميد گۇلگە سانكتسيا ەنگىزگەن ەدى.

نەگىزىنەن، اقش پەن تۇركيا اراسىنداعى ەكونوميكالىق تەكەتىرەس  تۇركيادا تۇراتىن امەريكالىق پاستور ەندريۋ برانسوننىڭ تۇركيا بيلىگى تاراپىنان تۇتقىندالۋى سەبەپ بولعان ەدى. پرەزيدەنت دونالد ترامپ شىلدە ايىنىڭ سوڭىندا پاستوردىڭ تۇتقىندالعانى ءۇشىن تۇركياعا سانكتسيا ەنگىزۋى مۇمكىن ەكەنىن ەسكەرتكەن بولاتىن. "پاستور ەندريۋ برانسوندى بوساتىڭىزدار نەمەسە ءبىزدىڭ قانداي شەشىمگە باراتىنىمىزدى كۇتە بەرىڭىزدەر",   - دەپ جازعان ەدى اقش پرەزيدەنتى.

“The Qazaq Times”