بۇۇ: سۇرياداعى اسكەري قاقتىعىس اياقتالۋعا جاقىن قالدى

بىرىككەن ۇلتتار ۇيىمى سۇرياداعى اسكەري قاقتىعىستىڭ اياقتالۋىنا از عانا ۋاقىت قالدى دەپ مالىمدەدى. ماسەلەن، كەشە، 9-تامىزدا بۇۇ-نىڭ سۇرياعا گۋمانيتارلىق كومەك كورسەتۋ جونىندەگى ارنايى وكىلىنىڭ كەڭەسشىسى يان ەگەلان وسىلاي دەپ حابارلاعان.

ونىڭ سوزىنشە، قازىرگى ۋاقىتتا ءسۇريا تەرريتورياسىندا «قورشاۋعا الىنعان» دەگەن كاتەگورياعا جاتاتىن ەشقانداي ايماق قالماعان. ەگەلان سونىمەن قاتار، ءسۇريانىڭ وڭتۇستىك-شىعىسىنداعى اسكەري قاقتىعىستاردىڭ اياقتالعانىن، سونىڭ ارقاسىندا ەلگە گۋمانيتارلىق كومەك جەتكىزۋگە مۇمكىندىكتەر اشىلعانىن دا اتاپ وتكەن.

ەسكە سالايىق، سۇرياداعى قارۋلى قاقتىعىس 2011 جىلدان بەرى جالعاسۋدا. وسى ۋاقىتتان بەرى ءجۇز مىڭداعان ادام قازا تاۋىپ، ميلليونداعان ادامدار بوسقىنعا اينالدى. جەنەۆا پەن استانا فورۋمدارى اياسىندا وسى قاقتىعىستى بەيبىت جولمەن شەشۋ كەلىسسوزدەرى جۇرگىزىلۋدە.

“The Qazaq Times”