ساۋد ارابياسى باستاعان كواليتسيا كۇشتەرىنىڭ يەمەندەگى ۇكىمەتكە قارسى حۋسيت كۇشتەرىنە جاساعان كەشەگى شابۋىلى كەزىندە 43 ادام قازا تاپقان. مالىمەتتەردە، قازا بولعانداردىڭ باسىم كوبى بالالار ەكەنى ايتىلۋدا. يەمەنگە كومەك كورسەتۋشى حالىقارالىق ۇيىمدار مەن اگەنتتىكتەر بۇل ىسكە كۇشتى قارسىلىق تانىتتى. بۇل تۋرالى VOA اقپاراتتىق قىزمەتى حابارلادى.

بەيسەنبى كۇنى جاسالعان شابۋىلدا 60-تان استام ادام جاراقات العان. ساۋد ارابياسى باستاعان كواليتسيا كۇشتەرىنىڭ اتقان ءبىر زىمىرانى جازعى لاگەردەگى وقۋشىلارعا ارنالعان اۆتوبۋسقا كەلىپ تيگەن. جەرگىلىكتى تەلە ارنالار تاراتقان حاباردا، اۋرۋحاناعا جەتكىزىلگەن بالالاردىڭ قاتتى ۇرەيلەنگەندىكتەن جىلاۋعا دا شامالارى كەلمەي قالعانىن انىق بايقاۋعا بولادى.

ساۋد ارابياسى جاعى حۋسيت كۇشتەرى بالالاردى قالقان رەتىندە پايدالاندى دەپ ايىپتادى. ال حۋسيت كۇشتەرى بۇل ايىپتاۋدى تەرىستەدى.

قۇراما شتات بولسا يران قولداۋ كورسەتكەن يەمەندەگى ۇكىمەتكە قارسى حۋسيت كۇشتەرىنە قارسى كۇرەستە ساۋد ارابياسى باسقارعان كواليتسيانى جاقتاپ كەلەدى. اقش مەملەكەتتىك دەپارتامەنتىنىڭ رەسمي وكىلى حەاتەر ناۋەرت سوزىندە: «كواليتسيا كۇشتەرى بۇل ىسكە تەرگەۋ جۇرگىزۋگە ۋادە بەردى جانە ءبىز ولاردىڭ سوزىنە سەنىم ارتامىز. بۇل ىسكە قاتىستى ءبىز ولارمەن تىعىز بايلانىستا بولامىز»، – دەدى.

بەيسەنبى كۇنگى شابۋىل ساادا پروۆينتسياسىنداعى قاقتىعىس توقتاتىلعان ايماقتا بولعان. بۇل ساۋد ارابياسىنىڭ شەكاراسىنا جاقىن ايماق. ءارى كەزەكتى شابۋىل سودان ەكى كۇن بۇرىن ساۋد ارابياسىنا باعىتتالعان زىمىران شابۋىلىنا بەرگەن جاۋاپ ەكەنى ءمالىم. سەيسەنبى كۇنگى زىمىران شابۋىلىندا 1 ادام قازا تاۋىپ، 11 ادام ءتۇرلى جاراقات العان بولاتىن.

ايتا كەتەيىك، يراننىڭ قولداۋىنداعى حۋسيت كۇشتەرى 2014 جىلى ۇكىمەتكە قارسى سوعىس باستاپ، ەل ورتالىعى سانا قالاسىن باسىپ العان. باتىس قولداۋىنداعى يەمەن ۇكىمەتى ساۋد ارابياسىنا باس ساۋعالاعان. ال، وسىدان 3 جىل بۇرىن ساۋد ارابياسى باسقارعان كواليتسيا كۇشتەرى يەمەنگە كىرىپ، ونداعى حۋسيت كۇشتەرىن تازالاۋ سوعىسىن باستاعان. دەگەنمەن، سوعىستا ەڭ كوپ زارداپ شەككەندەر تاعى دا يەمەندىك جازىقسىز بۇقارالار بولدى. 4 جىلدان بەرگى سوعىس يەمەندەگى مەكتەپ، اۋرۋحانا، تۇرعىن ءۇي، بالا باقشالاردى قيراتىپ، ميلليونداعان ادامدى اشارشىلىققا ۇشىراتتى.

“The Qazaq Times”