يزرايل ارمياسى جاعىنان 158 ادام وققا ۇشقان. فوتو: The Conversation.

يزرايل سارسەنبى كۇنى گازا سەكتورىنا اۋە شابۋىلدارىن باستادى. بۇعان قارسى پالەستينا ازاتتىق قوزعالىسىنا قاراستى كۇشتەر يزرايل شەكاراسىنا قاراتا زىمىران شابۋىلىن جاسادى. بۇۇ-نىڭ تاياۋ شىعىستاعى بەيبىتشىلىك پروتسەسى جونىندەگى ارنايى وكىلى ملادوۆ پالەستينا مەن يزرايل اراسىندا كەزەكتى قاقتىعىسقا الاڭداۋشىلىق ءبىلدىردى.

يزرايل قارۋلى كۇشتەرىنىڭ ايتۋىنشا، يزرايلدىك اسكەري ۇشاقتار حاماس-قا تيەسىلى وقۋ-جاتتىعۋ الاڭدارى مەن قارۋ-جاراق قويمالارىن شابۋىل نىساناسى ەتكەن. ءارى، بۇل ارەكەتتەرى وزدەرىنە قاراتىلعان زىمىران شابۋىلىنا الدىن الا بەرىلگەن جاۋاپ ەكەنىن ايتقان. يزرايل قارۋلى كۇشتەرىنىڭ مالىمدەمەسىندە: «كەزەكتى قاقتىعىستىڭ بارلىق جاۋاپكەرشىلىگى حاماس-تىڭ موينىندا»، – دەلىنگەن.

پالەستينا رەسمي وكىلدەرىنىڭ ايتۋىنشا، اۋە شابۋىلىنان جازىقسىز ايەل مەن بالاسى قازا تاپقان.

ال، يزرايل تارابى بەرگەن مالىمەتتە، سارسەنبى كۇنى كەشتەن باستاپ، يزرايلگە قاراتا 80 زىمىران اتىلعانى ايتىلادى.

بۇۇ-نىڭ تاياۋ شىعىستاعى بەيبىت پروتسەسىنە ارنايى وكىلى ملادوۆ سوزىندە: «ەگەر بۇل رەتكى قاقتىعىس دەر كەزىندە توقتاتىلماسا، شيەلەنىستى شەشۋدىڭ جولى ازايىپ، تۇبىندە ەكى ەلدەگى حالىق تا زارداپ شەگەتىن بولادى»، – دەدى.

بۇل رەتكى قاقتىعىسقا دەيىن يزرايل مەن حاماس اراسىندا كەلىسسوزدەر جاسالىپ، ءتورتىنشى رەت سوعىستى توقتاتۋ كەلىسىمىنە كەلگەن ەدى.

حاماستىڭ جوعارى لاۋازىمدى ادامى حاليل ءال-حايا «ءال-جازيراعا» بەرگەن سۇحباتىندا: «بۇۇ مەن مىسىرداعى ءىس-قيمىلدار ەلەۋلى ناتيجەگە قول جەتكىزەدى دەۋگە بولادى. ءبىز وسى جاسالىپ جاتقان شارالار وڭ ناتيجە بەرەدى دەپ ۇمىتتەنەمىز»، – دەگەن.

يزرايل پارلامەنت مۇشەلەرىنىڭ ءبىرى: «ءبىز گازا ماسەلەسى بويىنشا جاڭا ءداۋىردىڭ باستالعانىنا سەنەمىز»، – دەيدى.

پالەستينالىقتار ناۋرىزدان بەرى قاراي گازا مەن يزرايل شەكاراسىندا نارازىلىق شەرۋىن جالعاستىرىپ كەلەدى. ال، تەل-اۆيۆ تارابى بولسا سول ۋاقىتتان باستاپ ءيزرايلدىڭ قۇرىلعانىنىڭ 70 جىلدىعىنا دايىندالعان ەدى. ناۋرىزدان بەرى قاراي يزرايل ارمياسى تارابىنان 158 ادام ولتىرىلگەن. الايدا، ەۆرەي جاساقتارى ولاردىڭ كوبى يزرايلگە كىرۋدى ماقسات ەتكەن راديكال كۇشتەر دەپ قارايدى.

بۇدان بۇرىن تەل-اۆيۆ حاماس ۇيىمى تەررورلىق ارەكەتتەردى جاسىرۋ ءۇشىن وسى نارازىلىق شاراسىن ۇيىمداستىردى دەپ مالىمدەگەن. الايدا، حاماس ونى جوققا شىعاردى.

 “The Qazaq Times”