قازاقستاندا 80-نەن استام شەتەلدىك تەلەارنالاردىڭ تىركەۋ تۋرالى كۋالىكتەرى قايتارىلىپ، ەل اۋماعىندا حابار تاراتۋى توقتاتىلدى، دەپ حابارلايدى قر اقپارات جانە كوممۋنيكاتسيالار مينيسترلىگى

«تەلەديدار جانە راديو حابارلارىن تاراتۋ تۋرالى» قازاقستان رەسپۋبليكاسىنىڭ زاڭىنا ەنگىزىلگەن وزگەرتۋلەرگە سايكەس قازاقستان رەسپۋبليكاسىنىڭ اۋماعىندا حابار تاراتاتىن بارلىق شەتەلدىك تەلە جانە راديوارنالار وسى زاڭ قولدانىسقا ەنگىزىلگەن كۇننەن باستاپ التى اي ىشىندە قر اۋماعىندا زاڭدى تۇلعانى تىركەۋگە مىندەتتى.

2018 جىلدىڭ باسىنان باستاپ مينيسترلىك ءوز وكىلدىكتەرىن اشپاعان، شەتەلدىك تەلە جانە راديوارنالاردىڭ يەلەرىمەن ءوز قىزمەتىن قازاقستان زاڭناماسى تالاپتارىنا سايكەستەندىرۋ قاجەتتىلىگى تۋرالى اقپاراتتىق-ءتۇسىندىرۋ جۇمىستارىن جۇرگىزگەن بولاتىن.

قازاقستان اۋماعىندا حابار تاراتۋىن جالعاستىرۋعا قىزىعۋشىلىق تانىتاتىن شەتەلدىك تەلە جانە راديوارنالار ءوز وكىلدىكتەرىن اشىپ، قايتادان تىركەۋگە تۇرۋى قاجەت.

قازاقستان رەسپۋبليكاسى اۋماعىندا ءوز وكىلدىكتەرىن اشپاعان 88 تەلەارنانىڭ ءتىزىمى مينيسترلىك سايتىندا جاريالانعان.

مينيسترلىك اتالعان ارنالاردىڭ ەل اۋماعىندا حابار تاراتۋىن توقتاتۋدى قاراستىراتىن بۇيرىق ازىرلەدى»، - دەپ جازدى قر اقپارات جانە كوممۋنيكاتسيالار ءمينيسترى داۋرەن اباەۆ Facebook-تە.

“The Qazaq Times”