ترامپ پۋتينمەن تاعى ءبىر رەت كەزدەسكىسى كەلەتىنىن ايتتى

اقش پرەزيدەنتى دونالد ترامپ كەزەكتى مالىمدەمەسىندە رەسەي پرەزيدەنتىمەن تاعى ءبىر مارتە رەسمي كەزدەسۋ جاساۋى مۇمكىن ەكەنىن مالىمدەدى. بۇل تۋرالى VOA حابارلاعان بولاتىن.

ترامپ ءوزىنىڭ تۆيتتەر پاراقشاسىندا دۇيسەنبى كۇنى وتكەن كەزدەسۋ تۋرالى: «ۇلكەن جەتىستىكتەرگە جەتتىك، تەك جۇرتشىلىقتىڭ دۇشپانىنا اينالعان جالعان اقپاراتتارعا كەلىسە المايمىن»، – دەدى. ول جانە پۋتينمەن ەكىنشى رەت كەزدەسۋدى ءۇمىت ەتەتىنىن، كەلەسى كەزدەسۋ تالقىلانعان كوپتەگەن ماڭىزدى ماسەلەنى ىسكە اسىرۋ ءۇشىن اسا قاجەتتى ەكەنىن دە ايتىپ ءوتتى.

وسىمەن ءبىر ۋاقىتتا رەسەي پرەزيدەنتى ۆلاديمير پۋتين اقش-تاعى ساياسي كۇشتەردى كەزدەسۋدىڭ سيپاتىن بۇرمالادى دەپ ايىپتادى. ول جانە مۇنداي پىكىرلەر اقش-تىڭ وزىنە عانا زيان جەتكىزەتىنىن ايتقان.

پۋتين سوزىندە: «ءبىز كەيبىر ساياسي كۇشتەردىڭ قۇراما شتاتتا وزدەرىنىڭ ساياسي امبيتسياسىن جۇزەگە اسىرۋ ءۇشىن، وزدەرىنىڭ ىسكەرلىك توپتارىنىڭ مۇددەسىن عانا قورعاۋ ءۇشىن اقش-رەسەي قارىم-قاتىناسىن قۇربان ەتەتىنىن، ميلليونداعان دوللار كولەمىندەگى كەلىسىمشارتتاردى جوعالتىپ، رەسەي نارىعىنان دا باس تارتىپ، ناتيجەسىندە اقش-تى دا تىعىرىققا تىرەيتىنىن كورىپ وتىرمىز»، – دەدى.

ءپۋتيننىڭ ويىنشا، دۇيسەنبى كۇنى وتكەن كەزدەسۋ «ەكى ەلگە دە ءتيىمدى باعىتتارعا جول اشادى».  دەگەنمەن، دۇيسەنبى كۇنى ەكى ەلدىڭ پرەزيدەنتى قانداي كەلىسىمدەر جاساسقانى، قانداي ۋادەلەرگە قول الىسقانى تۋرالى انىق مالىمەت تاراتىلمادى.

“The Qazaq Times”