تۇركيادا توتەنشە جاعداي رەجيمى الىنىپ تاستالدى

تۇركيادا 2016 جىلعى توڭكەرىس ارەكەتىنەن كەيىن ەنگىزىلگەن توتەنشە جاعداي رەجيمى توقتاتىلدى، - دەپ حابارلايدى Anadolu.

تۇركيا رەسپۋبليكاسىنىڭ كونستيتۋتسياسىنا سايكەس، ەگەر ۇكىمەت ونىڭ مەرزىمى اياقتالعان كەزدە پارلامەنتكە ونى ۇزارتۋ تۋرالى ەسكەرتۋ جىبەرمەگەن جاعدايدا توتەنشە جاعداي وزىنەن-ءوزى توقتاتىلادى. نەگىزى، 2016 جىلدان كەيىن توتەنشە جاعداي تۇركيادا جەتى مارتە ءۇش ايعا ۇزارتىلدى. سونىمەن قاتار، پرەزيدەنت رەجەپ تايىپ ەردوعاننىڭ ءباسپاسوز قىزمەتى بيلىكتىڭ فەتو ۇيىمىمەن كۇرەستى جالعاستىراتىنىن حابارلاعان. ايتا كەتۋ كەرەك، رەسمي انكارا ۇيىم باسشىسى فەتۋللاھ گۇلەندى وسى توڭكەرىس ارەكەتىن ۇيىمداستىردى دەپ ەسەپتەيدى. اقپارات قۇرالدارى، ەگەر قاجەتتىلىك تۋىنداعان جاعدايدا توتەنشە جاعدايدىڭ قايتادان ەنگىزىلەتىنىن دە حابارلادى.

ەسكە سالايىق، 2016 جىلدىڭ 16 شىلدەسىندە تۇركيادا ءساتسىز توڭكەرىس ارەكەتى ورىن الىپ، ارتىنشا 40 مىڭنان استام ادام تۇتقىندالعان ەدى. بۇلىك سالدارىنان 161 ادام قازا تاۋىپ، 1440 ادام جاراقاتتانعان. پرەزيدەنت ر.ت.ەردوعان مەملەكەتتىك توڭكەرىس ارەكەتىنە فەتۋللاھ گۇلەندى كىنالايدى.

“The Qazaq Times”