اقش ەۋرووداق، قىتاي جانە تاعى ءۇش ەلدىڭ ۇستىنەن دسۇ-نا شاعىم ءتۇسىردى

اقش بيلىگى ەو، كانادا، قىتاي، مەكسيكا جانە تۇركيا ەلدەرىنىڭ اق ۇيگە جاۋاپ رەتىندە ەنگىزگەن كەدەندىك سالىقتارى ءۇشىن دۇنيەجۇزىلىك ساۋدا ۇيىمىنا شاعىم ءتۇسىردى. بۇل تۋرالى مالىمەتتى اقش ساۋدا وكىلى باسقارماسىنىڭ ءباسپاسوز قىزمەتى حابارلادى.

امەريكالىق ۆەدوموستۆا جوعارىدا اتالعان ەلدەردىڭ ءاليۋمينيى مەن بولاتىنا سالىنعان اقش-تىڭ كەدەندىك سالىقتارى «حالىقارالىق كەلىسىمشارتتارعا ساي» دەپ ەسەپتەيدى. سوندىقتان، اتالعان ەلدەردىڭ وسى ارەكەتتەرى «حالىقارالىق قۇقىقتارعا سايكەس كەلەتىن ەشقانداي نەگىزگە يە ەمەس». «ءبىزدىڭ كەيبىر ساۋدا سەرىكتەستەرىمىز ورتاق ماسەلەلەردى شەشۋ ءۇشىن بىرگە جۇمىس ىستەۋدىڭ ورنىنا،  سالىق ەنگىزۋگە شەشىم قابىلدادى. ولاردىڭ ماقساتى امەريكالىق فەرمەردى، جۇمىسشىلاردى جانە كومپانيالاردى جازالاۋ»، - دەگەن اقش-تىڭ دسۇ-عى ساۋدا وكىلى روبەرت لايتحايزەر.

ەستەرىڭىزگە سالايىق، وسى جىلدىڭ باسىندا دونالد ترامپ جوعارىدا اتالعان ەلدەردەن شىعارىلاتىن بولاتقا 25%، ال اليۋمينيگە 10% كولەمىندە كەدەندىك سالىق ەنگىزگەن ەدى. كەيىننەن، اقش قىتاي تەحنيكاسىنا دا 25%-ق سالىق ەنگىزدى. وسىعان جاۋاپ رەتىندە قىتايدىڭ تاريفتىك كوميسسياسى  جالپى سوماسى 50 ميلليارد دوللار كولەمىندەگى امەريكالىق تاۋارلارعا 25% كولەمىندە سالىق ەنگىزۋگە شەشىم قابىلداعان ەدى. سونداي-اق، كانادا دا امەريكالىق ونىمدەرگە كەدەندىك سالىق ەنگىزگەنى تۋرالى حابارلاعان بولاتىن.

“The Qazaq Times”