فوتو: QT

شىلدە ايىنىڭ 13-15 كۇندەرى «ەر جانىبەك» حالىقارالىق قوعامدىق قورىنىڭ ۇيىمداستىرۋىمەن سەگىز سەرىنىڭ 200-جىلدىعىنا ارنالعان شاعىن فۋتبولدان  «Er Janibek CUP-2018» ءتۋرنيرى ۇيىمداستىرىلدى. وسىمەن 4-ءشى جىل قاتارىنان ۇيىمداستارىلىپ وتىرعان سايىسقا فرانتسيا، تۇركيا، اۆستريا، دانيا، رەسەي، مونعوليا، وزبەكستان، يران، قىرعىزستان ەلدەرىندە تۇراتىن قانداستارىمىزدان قۇرالعان قۇرامالار قاتىستى. سونىمەن قاتار، الماتى، استانا قالالارىنان جانە ەلىمىزدىڭ وزگە دە 4 وبلىسىنان بارلىعى 25 كوماندا باق سىناستى.

جارىس قورىتىندىسى بويىنشا، ءى-ورىندى الماتى قالاسىنان «ساۋىر» كومانداسى، ءىى-ورىندى «بىرلىك كەرۋەن» (الماتى), ءىىى-ورىندى ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى، ال ءتورتىنشى ورىندى پەتروپاۆلدىق «دينامو» كومانداسى يەمدەندى. ولاردىڭ ىشىندە، «ۇزدىك شابۋىلشى» رەتىندە — رۋسلان كوپەەۆ (دينامو، پەتروپاۆل), "ۇزدىك قاقپاشى" — مۇحاماديا احمادەەۆ (ش.ءۋاليحانوۆ اتىنداعى كمۋ), "ۇزدىك قورعاۋشى" — ەركىن نۇرجانوۆ (بىرلىك كەرۋەن، الماتى), «سۇرمەرگەن» (بومباردير) ۇزدىگى رەتىندە — قۋانىش سوۆەتوۆ (19-دوپ، ساۋىر، الماتى) انىقتالدى. ال، «استانانىڭ 20 جىلدىعى» نوميناتسياسى بويىنشا — ىستامبۇل، تۇركيا جەڭىسكە جەتسە، «ۇلتتىق رۋحتى» — "FC Europe" كومانداسى (اۆستريا، ۆەنا) قانجىعاعا بايلادى.

“The Qazaq Times”