قىتايلار ديماش قۇدايبەرگەن تۋرالى فيلم تۇسىرمەك

قىتايلىق كينوكومپانيا قازاقستاندىق ءانشى ديماش قۇدايبەرگەن تۋرالى فيلم ءتۇسىرۋدى جوسپارلاپ وتىر. بۇل تۋرالى قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساحودجاەۆا مالىمدەدى.

«وسى جىلى «BJ Brothers» كومپانياسىمەن بىرلەسە جۇمىس ىستەيمىز. ولار «ەۋرازيا» كينوفەستيۆالىنە قاتىسادى. سول كەزدە ديماش تۋرالى ءفيلمنىڭ ستسەناريىن اقىلداسامىز. قىتايلىق كومپانيا قازاقستاندىق ءانشى تۋرالى كينو ءتۇسىرۋدى بۇرىننان ارمانداپ ءجۇر» - دەدى، مۇساحودجاەۆا.

ازىرگە فيلم كونتسەپتسياسى، سيۋجەتى مەن جانرى قانداي بولارى بەلگىسىز. تاراپتار بۇل ماسەلەنى اقىلداسىپ شەشپەك.

ديماش قۇدايبەرگەن بيىل قازاق ۇلتتىق ونەر ۋنيۆەرسيتەتىن ءتامامداپ، ديپلوم الادى. تۇلەكتەر كەشىنە قاتىسىپ، استانادا شاعىن كونتسەرت قويۋدى جوسپارلاپتى. ونى تاماشالاۋعا الىس-جاقىن ەلدەردەن ءانشىنىڭ جانكۇيەرلەرى دە كەلمەك.

“The Qazaq Times”