فوتو: lemonde.fr

اۋعانستاننىڭ شىعىسىنداعى نانگارحار قالاسىنىڭ اكىمشىلىك ورتالىعى بولىپ سانالاتىن جالالابادتا ەكى بىردەي جارىلىس ورىن الىپ، سالدارىنان 44 ادام كوز جۇمعان.

جارىلىستىڭ ءبىرىنشىسى ورىن العان بويدا 36 بەيبىت تۇرعىن قازا تاپقان. ال، ەكىنشى جارىلىس كەزىندە «تاليبان» توبىنىڭ 18 مۇشەسى كوز جۇمعان. ازىرگە ەشقانداي تاراپ شابۋىلدى ءوز موينىنا الماعان. الايدا، اۋعانستاندىق كوپتەگەن ساراپشىلار بۇل ءىستىڭ ارتىندا دايش توبىنىڭ تۇرعانىن العا تارتادى. وسىعان دەيىن اۋعانستان پرەزيدەنتى اشراف گاني ۋاقىتشا ءبىتىم تۋرالى بىرجاقتى شەشىم قابىلداعان بولاتىن. ال، ول كەشە، 17 ماۋسىمدا وسى ۋاقىتشا ءبىتىمدى تاعى ون كۇنگە ۇزارتۋعا ۇكىم شىعاردى. الايدا، اۋعان تالىپتەرى ءبىتىم مەرزىمىنىڭ بۇلايشا ۇزارتىلۋىنا قارسىلىق بىلدىرۋدە. ولار: «اتىستى توقتاتۋ رەجيمىن بۇگىن كەشكە اياقتايمىز. ءبىز ءوزىمىزدىڭ وپەراتسيالارىمىزدى قايتا جاڭارتامىز. ۋاقىتشا ءبىتىم تۋرالى كەلىسىمشارتتى ۇزارتاتىن ويىمىز جوق» ، - دەگەن تالىپتەردىڭ باسشىسى.

 “The Qazaq Times”