تۇركىمەنستان دۇكەندەرىندە ازىق-تۇلىك شەكتەۋلى مولشەردە، تەك ەرەسەكتەرگە عانا ساتىلۋدا

تۇركىمەنستان استاناسى اشحاباتتاعى مەملەكەتكە قاراستى دۇكەندەردە ازىق-تۇلىك تەك شەكتەۋلى مولشەردە عانا ءارى تەك ەرەسەكتەرگە ساتىلۋدا. ماسەلەن، قانت پەن جۇمىرتقا ساتىپ الۋشىلار 1 كيلوگرامم قانت پەن 10 جۇمىرتقادان اسىرماۋ كەرەك. بۇل تۋرالى «تۇركىمەنستان جاڭالىقتارى» باسىلىمى حابارلادى.

ازىق-تۇلىكتەر الدىن الا تارازىعا تارتىلىپ قويىلعان. بالالارعا ەشقانداي تاعام تۇرلەرى ساتىلمايدى. ساتۋشىلاردىڭ ايتۋلارىنشا، ەگەر بالالارعا دا ازىق-تۇلىك ساتىلاتىن بولسا، وندا اتا-انالار تاپشى تاۋارلار ءۇشىن بالالارىن كەزەككە قويىپ قويار ەدى دەيدى.

وتكەن جىلدىڭ كۇز ايلارىنان بەرى تۇركىمەنستاندا ازىق-تۇلىك تاپشىلىعى قاتتى ارتۋدا. اشحاباتتان تىس ايماقتاردا ۇن، نان، قانت جانە كۇنباعىس مايى سىندى ونىمدەرگە كەزەك كۇشەيگەن. كۋاگەرلەردىڭ ايتۋلارىنشا، كەيدە مۇنداي وقيعالاردىڭ سوڭى جانجال مەن ۇرىس-كەرىسكە دە ۇلاسادى ەكەن. ءتىپتى ەلدىڭ سولتۇستىگىندە تۇرعىندار كەبەك تيەلگەن جۇك كولىكتەرىنە شابۋىلدايتىن جاعدايعا جەتكەن.

حالىقارالىق رەسمي ۇيىم ساراپشىلارى تۇركىمەنستانداعى ازىق-تۇلىك تاپشىلىعى مەن باعا ءوسىمىن ەلدەگى ۆاليۋتانىڭ جەتىسپەۋشىلىگى مەن وتكەن جىلعى استىق كولەمىنىڭ ازدىعىنان تۋىنداعان دەپ باعالايدى.

“The Qazaq Times”