تۇركىمەنستان بيلىگى شەتەلدە نان تاۋىپ جۇرگەن ازاماتتارىن كەرى قايتارۋدا

تۇركىمەنستان ۇكىمەتى كۇنكورىس ءۇشىن شەت ەلدەردە جۇمىس ىستەپ جۇرگەن تۇرىكمەن ازاماتتارىن ەلگە قايتارۋ شارالارىن قولعا الدى. بۇل تۋرالى ca-news.org اگەنتتىگى حابارلايدى.

قازىرگى ۋاقىتتا تۇرىكمەن شەنەۋنىكتەرى «ەسكى تولقۇجاتتارمەن» شەت مەملەكەتتەردە جۇرگەن ازاماتتارىنا ءۇش اپتا ىشىندە جەدەل تۇردە جاڭا قۇجات جاساپ بەرۋگە، سونىمەن قاتار، كوشى-قون تۋرالى زاڭدى بۇزىپ، شەتەلدە جۇرگەندەردىڭ جاۋاپكەرشىلىككە تارتىلمايتىندىقتارىنا ۋادە بەرگەن. وسى كۇندەرى ميگرانتتاردى وتاندارىنا قايتارۋ ماسەلەسىنە قاتىستى كەلىسسوزدەر جالعاسۋدا. بۇدان بۇرىن تۇركىمەنستان بيلىگىنىڭ شەت ەلدەردە جۇمىس ىستەپ جۇرگەن ءارى تۇركىمەنستاننىڭ كوشى-قون تۋرالى زاڭىن بۇزۋشى ازاماتتارعا قانداي جازا تاعايىندالاتىنىنا قاتىستى ماسەلەنى كۇن تارتىبىنە شىعارعانى بەلگىلى. ەندى، بيلىكتىڭ سوڭعى مالىمدەمەسىنە سايكەس، وسى جازادان قاشىپ جۇرگەن تۇرىكمەن ازاماتتارىنا ەشقانداي قاۋىپ ءتونىپ تۇرعان جوق. تۇرىكمەن اقپارات قۇرالدارىنىڭ حابارلارىنا قاراعاندا، قازىرگى ساتتە شەتەلدە جۇمىس ىستەپ جۇرگەندەردىڭ تۋىستارى مەن جاقىندارىنا ولاردى ەلگە شاقىرۋعا وتىنىشتەر جاسالعان. تاعى ايتا كەتەتىن ءبىر جايت، بەيرەسمي مالىمەتتەر جوعارىداعىداي ۋادەلەردەن بولەك، ولاردىڭ تۋىستارىنا قىسىم كورسەتىلىپ جاتقانىن، اسىرەسە مەملەكەتتىك قىزمەتكەرلەرگە تۋىستارىن قايتارۋعا قاتىستى تالاپ پەن قىسىمنىڭ كۇشەيگەنى تۋرالى حابار تاراتۋدا.

تۇرىكمەنستان ۇكىمەتىنىڭ شەتەلدە نان تاۋىپ جۇرگەن ءوز ازاماتتارىن نە ءۇشىن وتاندارىنا قايتارۋعا كىرىسكەنى تۋرالى ناقتى ءارى انىق مالىمەت جوق. ايتا كەتۋ كەرەك، تۇرىكمەندەر كۇنكورىس قامى ءۇشىن نەگىزىنەن تۇركيا ەلىنە كوپ بارادى. تۇركيانىڭ كوشى-قون قىزمەتىنىڭ دەرەكتەرىنە سايكەس، تەك 2016-2016 جىلداردىڭ وزىندە شامامەن 30 مىڭ تۇرىكمەن ازاماتى تۇركيادا رەسمي تۇردە تىركەلگەن. ال، سوڭعى ۋاقىتتا ولاردىڭ باسىم كوپشىلىگى كوبىنەسە ءازىربايجان، وزبەكستان جانە قازاقستانعاقاراي اعىلا باستاعان.

“The Qazaq Times”