فوتو: داريعا نازارباەۆا

د.نازارباەۆا ازيا ەلدەرىنىڭ اراسىندا ورتاق «Silk viza» شەنگەن ۆيزاسىن قۇرۋدى ۇسىندى. وسىعان قاتىستى ناقتى ۇسىنىس ۇكىمەتكە پارلامەنت سەناتىنىڭ حالىقارالىق قاتىناستار، قورعانىس جانە قاۋىپسىزدىك جونىندەگى كوميتەت مۇشەلەرىنىڭ كەزدەسۋ قورىتىندىسى بويىنشا جبەرىلەدى. بۇل تۋرالى سەنات كوميتەتىنىڭ ءتورايىمى داريعا نازارباەۆا ايتتى، دەپ حابارلايدى قر پارلامەنت سەناتىنىڭ ءباسپاسوز قىزمەتى.

قازاقستان مەن وزبەكستاننىڭ سەناتورلارى كەدەندىك رەتتەۋدى جەتىلدىرۋ، ساۋدا اينالىمىن ارتتىرۋ جانە تۋريزم سالاسىنداعى ىنتىماقتاستىقتى دامىتۋعا قاتىستى ۇسىنىستارىن ايتتى. «اشىق ءارى جولداستىق شەكارا قۇرۋ كەرەك. سول كەزدە بارلىق سالا وزدىگىنەن رەتتەلەدى»، - دەدى د.نازارباەۆا. ونىڭ ايتۋىنشا، بۇل ءۇشىن كەدەندىك ىستەردىڭ ءبارىن بىرىڭعايلاۋ كەرەك. زاماناۋي اقپاراتتىق جۇيەسىز شەكارادا باقىلاۋ ورناتۋ مۇمكىن ەمەس. سەناتورلار ەكى ەلدىڭ تۋريستىك مۇمكىندىكتەرىنىڭ دامۋى ماسەلەلەرىن دە قاراستىردى.

«تەك قازاقستان مەن وزبەكستاننىڭ عانا ءتۋريزمىن دامىتۋعا كۇش جۇمساماۋ كەرەك. الىس شەت ەلدەردەن ورتالىق ازيانىڭ كورىكتى جەرلەرىن بىردەن كورۋدى قالايتىن تۋريستەردىڭ ساپارلارىن دا جەڭىلدەتۋىمىز كەرەك. ول ءۇشىن ورتاق ۆيزا جاساۋ كەرەك» ، - دەگەن د.نازارباەۆا «Silk viza» ازيالىق شەنگەن قۇرۋدى ۇسىندى.

“The Qazaq Times”