ينفەكتسيالىق اۋرۋحانانىڭ سۇرىقسىز كۇيى ەلدى شوشىتتى

قاسكەلەڭدەگى ينفەكتسيالىق اۋرۋحانا قۇلاۋعا شاق تۇر. قابىرعالارى قاق جارىلىپ، ىرگەسى سوگىلىپ كەتكەن. ودان بولەك، ءدالىز ەدەندەرى دە ورتاسىنا وپىرىلىپ، بۇلىنگەن جەرلەرى جامالىپتى. ەمدەۋ مەكەمەسىنىڭ سۇرىقسىز كۇيىن وبلىس تۇرعىندارىنىڭ ءبىرى سۋرەتكە ءتۇسىرىپ، الەۋمەتتىك جەلىدە تاراتتى.

اۋرۋحاناعا جەتكىزىلگەن ناۋقاستىڭ ايتۋىنشا، ورتالىقتا سانيتارلىق تالاپ مۇلدەم ساقتالماعان. وسىنىڭ كەسىرىنەن ونداعى ادامدار اۋرۋ ۇستىنە اۋرۋ جاماپ جاتقان كورىنەدى.

انىقتالعانى - مۇندا 15 پالاتاعا ورتاق تەك ءبىر عانا جۋىناتىن ورىن بار ەكەن. تازالىققا جاۋاپتى ماماندار ناۋقاستار جاتقان بولمەلەردى مۇلدەم تازارتپايدى-مىس. دارىگەرلەرگە بىرنەشە رەت ءتىس جارىپ كورگەن، الايدا مەديكتەردىڭ ەشبىرى ناۋقاستاردىڭ شاعىمىنا قۇلاق اسپاپتى.

بۇل ماسەلەگە جۋرناليستەر ارالاسقان سوڭ، قاسكەلەڭ قالالىق ينفەكتسيالىق اۋرۋحاناسىنىڭ باس دارىگەرى جانىبەك بوتباەۆ ناۋقاستىڭ شاعىمىنا قاتىستى تۇسىنىكتەمە بەردى. ونىڭ ايتۋىنشا، اۋرۋحاناعا سوڭعى رەت جوندەۋ جۇمىستارى 1998 جىلى جۇرگىزىلگەن. عيماراتتى جاڭارتۋعا ازىرگە قاراجات بولىنبەپتى.  سوندىقتان امالسىز وسىنداي كۇيدە وتىر ەكەن.

“The Qazaq Times”