بۇگىن، 4 ماۋسىمدا پاريج ءتارتىپ ساقشىلارى بوسقىندارعا ارنالعان ەكى زاڭسىز لاگەردى جويۋدى قولعا الادى. بۇل تۋرالى france24.com/fr حابارلايدى. 

ءپاريجدى قالانىڭ سولتۇستىك-شىعىسىنداعى زاڭسىز لاگەرلەردەن «تازالايتىندارىن» ايتقان ءتارتىپ ساقشىلارى وزدەرىنىڭ بۇل ارەكەتتەرىن فرانتسيا بيلىگىنىڭ كوشى-قون  ماسەلەسىنە بايلانىستى قابىلداعان شاراسى دەپ ءتۇسىندىردى.

ايتا كەتۋ كەرەك، سوڭعى ءۇش جىلدان بەرى فرانتسيا بوسقىندار ماسەلەسىمەن كۇرەسىپ كەلەدى. وسىدان بۇرىن، 30 مامىر كۇنى دە پاريجدىك ءتارتىپ ساقشىلارى بوسقىنداردىڭ «مىڭجىلدىق» دەپ اتالاتىن ءىرى لاگەرىن تاراتقان بولاتىن. اتالعان لاگەر بىرنەشە جىل بۇرىن اپاتتى جاعدايدا پايدا بولعان ەدى. ەندى، افريكا ەلدەرىنەن كەلگەن 2000-عا جۋىق بوسقىندى كوشىرۋ جەرگىلىكتى ۋاقىت بويىنشا، تاڭعى ساعات 6-دا باستالعان. ولار ءپاريجدىڭ ماڭىنداعى ارنايى بازالارعا ورنالاستىرىلعان. ولاردىڭ ەندىگى تاعدىرلارى تۋرالى شەشىم قارالۋدا، دەپ حابارلايدى france24.com/fr.

“The Qazaq Times”