كۇنى كەشە، ياعني 31 مامىردا اقش پرەزيدەنتى دونالد ترامپ كانادا، مەكسيكا جانە ەۋروپا وداعى ەلدەرى ءۇشىن بولات پەن اليۋمينيگە 10% جانە 25% كولەمىندە باج سالىعىن ەنگىزۋگە شەشىم قابىلداعانى تۋرالى جازعانبىز.  اق ءۇي باسشىسى كوپتەن بەرى كوتەرىپ كەلە جاتقان وسى شەشىمىن، كەشىكتىرسە دە اقىرى قابىلدادى. ارينە، بۇعان ەشقانداي ەلدىڭ قول شاپاتتاپ، قۋانباسى انىق. ەندەشە، ەۋروداق ەلدەرىنىڭ ساياساتكەرلەرى بۇدان قانداي قورىتىندى شىعارۋدا؟

ماسەلەن، گەرمانيانىڭ ەكونوميكا ىستەرى جونىندەگى ءمينيسترى پەتەر التمايەر "ەۋروداقتان شىعارىلاتىن بولات پەن اليۋمينيگە ەنگىزىلگەن سالىقتان ەڭ الدىمەن اقش-تىڭ ءوزى باستاپ زارار كورەدى", - دەپ سانايدى . بۇل  تۋرالى ول كەشە، 31 مامىر كۇنى گەرمانيالىق تەلەارناعا بەرگەن سۇحباتىندا ايتتى. ونىڭ ايتۋىنشا، وسىنداي «جازالاۋ» سالىعى «ۇلتتىق ەكونوميكاعا ەداۋىر زيان اكەلەدى» جانە الدىمەن اقش-تىڭ ءوزىنىڭ ساياساتىنا كەرى اسەر ەتەدى. سونىمەن قاتار، ساياساتكەر ۆاشينگتوننىڭ بۇل شەشىمى دۇنيەجۇزىلىك ساۋدا ۇيىمىنىڭ ەرەجەلەرىنە ۇيلەسپەيدى دەپ ەسەپتەيدى.

ايتاي كەتەيىك، ترامپ قابىلداعان سالىق تۇرلەرى بۇگىننەن، ياعني 1-ماۋسىم، ساعات تۇنگى 00:00-دەن باستاپ كۇشىنە ەندى.

ال، وسى ورايدا فرانتسيا پرەزيدەنتى ەممانۋەل ماكرون نە دەيدى؟ فرانتسۋز باسشىسى دا ترامپتىڭ شەشىمىنە نارازى. ماسەلەن، ول: «اق ءۇي قابىلداعان باج سالىعى زاڭسىز ءارى ۇلكەن قاتەلىك بولىپ تابىلادى، سونىمەن قاتار ول حالىقارالىق تەپە-تەڭدىكتى بۇزادى»، - دەپ مالىمدەدى. بۇل تۋرالى فرانتسيالىق «Le Figaro» باسىلىمىندا جاريالاندى. كەشە، 31 مامىر كۇنى ماكرون امەريكالىق ارىپتەسى دونالد ترامپپەن تەلەفون ارقىلى كەلىسسوز جۇرگىزگەن ەدى. وندا ول ترامپتىڭ بولات پەن اليۋمينيگە باج سالىعىن ەنگىزۋى زاڭسىز ءارى قاتەلىك دەپ باعا بەردى. فرانتسيانىڭ ەكس-ءمينيسترى (ەكونوميكا) ەو ۆاشينگتوننىڭ وسى ارەكەتىنە «قاتاڭ ءارى لايىقتى» جاۋابىن بەرەتىنىن دە ايتىپ قالدى. «مەن، اقش-تىڭ ەو ەلدەرى ءۇشىن بولات پەن اليۋمينيگە قاتىستى بۇگىن قابىلداعان شەشىمىنە وكىنىشىمدى  بىلدىرەمىن. مەن، بۇل شەشىم زاڭسىز بولۋمەن قاتار، بارلىق جاعىنان قاتەلىككە تولى دەپ سانايمىن. ول ەكونوميكالىق ۇلتشىلدىق ارقىلى حالىقارالىق تەپە-تەڭدىكتى بۇزدى. ال ەكونوميكالىق ۇلتشىلدىق — بۇل سوعىس»، - دەدى ول.

گەرمانيا، فرانتسيا ەلدەرىنەن بولەك، بەلگيانىڭ ءسىم باسشىسى ديدە رەيندەرس تە ەۋروداق ەلدەرىن بىرلەسكەن شتاتتاردىڭ اتالعان شەشىمىنە قاتىستى جاۋاپسىز قالماۋعا شاقىردى. «مەن اقش-تىڭ قولدامپازدىق شەشىم قابىلداعانىنا وتە وكىنىشتىمىن»، - دەپ جازدى ول ءوزىنىڭ «Twitter» الەۋمەتتىك جەلىسىندەگى جەكە پاراقشاسىندا.

ال، ەۋروكوميسسيا باسشىسى جان-كلود يۋنكەر ەۋروداقتىڭ بۇل ماسەلەگە مىندەتتى تۇردە جاۋاپ بەرەتىنىن مالىمدەدى.

  “The Qazaq Times”