«تۇركيا ازىربايجان جەرلەرىن ارميانداردىڭ باسقىنىنان اراشالاۋ جولىنداعى جۇمىستارىن جالعاستىرا بەرەدى»، - دەگەن تۇركيا پرەزيدەنتى ءارى ادىلەت جانە دامۋ پارتياسىنىڭ (AK parti) باسشىسى رەجەپ تايىپ ەردوعان، 24 مامىر كۇنى پارتيانىڭ سايلاۋالدى باعدارلاماسىنا تاعى قانداي ماسەلەلەردى ەنگىزگەنىن مالىمدەدى. بۇل تۋرالى تۇركيانىڭ «sondakika32.com» اگەنتتىگى حابارلايدى.

«ءبىز ۋكراينانىڭ قىرىم ماسەلەلەرى جونىندەگى ايماقتىق تۇتاستىعىن قورعايتىن بولامىز. كيپر ماسەلەلەرىنىڭ ءادىل شەشىم تابۋى ءۇشىن كۇرەسىمىزدى توقتاتپايمىز. پالەستينالىقتاردى قولداۋدى جالعاستىرامىز. ءسۇريا توپىراعىن تەرروريستەردەن تازارتامىز. سۇريامەن تاتۋ كورشىلىك قاتىناس ورناتىپ، ولاردىڭ جاڭا ۇكىمەتىن قولدايتىن بولامىز»، دەلىنگەن اق پارتيانىڭ سايلاۋالدى باعدارلاماسىندا.

تۇركيانىڭ رەسمي اقپارات قۇرالدارىنىڭ حابارلاۋىنشا، مەرزىمىنەن بۇرىن وتەتىن سايلاۋعا ۇمىتكەر رەتىندە قاتىساتىن تۇركيا پرەزيدەنتى ەردوعان، سەنبى، 26 مامىر كۇنى ۇگىت ناۋقانىن باستايدى. وسى ناۋقان تۋرالى ايتقان تۇرىك باسشىسى ءوزىنىڭ سايلاۋالدى باعدارلاماسى مەن اق پارتيا اتىنان دەپۋتاتتىققا تۇسەتىن ۇمىتكەرلەردى دە تانىستىردى.

ەسكە سالايىق، 24 ماۋسىم كۇنى تۇركيادا مەرزىمىنەن بۇرىن پرەزيدەنتتىك جانە پارلامەنتتىك سايلاۋ وتەدى. 27-شاقىرىلىمداعى پارلامەنت سايلاۋىنا "ادىلەت جانە دامۋ پارتياسى" (اك Partisi), "ۇلى بىرلىك پارتياسى" (Büyük Birlik Partisi), "تاۋەلسىز تۇركيا پارتياسى" (Bağımsız Türkiye Partisi), "رەسپۋبليكاشىل حالىق پارتياسى" (Cumhuriyet Halk Partisi), "دەموكرات پارتياسى" (Demokrat Parti), "حالىق دەموكراتيالىق پارتياسى" (Halkların Demokratik Partisi), "جاقسى پارتيا" (İYİ parti), "ۇلتشىل قوزعالىس پارتياسى" (Milliyetçi Hareket Partisi), "باقىت پارتياسى" (Saadet Partisi) جانە "وتان" (Vatan) پارتيالارىنىڭ اتىنان ۇمىتكەرلەر قاتىسادى.

ەندەشە، مەرزىمىنەن بۇرىن وتەتىن وسى سايلاۋ تۇركيادا قانداي وزەرىستەر ورناتپاق؟ الدىن الا حابارلانعان رەسمي مالىمەتتەرگە سايكەس، مەرزىمىنەن بۇرىن وتەتىن سايلاۋ قورىتىندىسى بويىنشا، 2017 جىلدىڭ 16 ساۋىرىندەگى رەفەرەندۋمدا قابىلدانعان تۇركيانىڭ اتا زاڭىنا ەنگىزىلگەن وزگەرىستەر كۇشىنە ەنەدى. اسىرەسە، تۇركيا پارلامەنتىندەگى دەپۋتاتتاردىڭ سانى 550-دەن 600-گە ارتادى. پرەمەر-مينيستر لاۋازىمى جويىلادى. مينيسترلەردى تاعايىندايتىن اتقارۋشى بيلىك باسشىسى رەتىندە پرەزيدەنت قالادى. ۆيتسە-پرەزيدەنتتەر ينستيتۋتى ەنگىزىلەدى. پارلامەنت ۇكىمەت جۇمىسىن باقىلاۋ مانداتىنان ايىرىلادى.  الايدا، ەگەر 600 دەپۋتتاتتىڭ جارتىسىنان كوبى (301 دەپۋتات) تاراپىنان قولداۋ تاپقان جاعدايدا، پارلامەنت پرەزيدەنتتىڭ يمپيچمەنتى تۋرالى تالاپتى قاراستىرا الادى. يمپيچمەنتكە داۋىس بەرۋ جاسىرىن داۋىس بەرۋ تۇرىندە ءبىر اي بويى جالعاسادى.

“The Qazaq Times”