كورەي تۇبەگى قايشىلىعى ۇزاققا سوزىلماق: پۋتين كيم جوڭ ۋندى قولدادى

رەسەي ۇكىمەتى اقش پرەزيدەنتى ترامپتىڭ سولتۇستىك كورەيا باسشىسىمەن كەزدەسۋدى كۇشىنەن قالدىرۋ تۋرالى شەشىمىن سىنعا الدى. سونىمەن بىرگە، رەسەي مەن قىتاي الداعى ۋاقىتتا كورەي تۇبەگى ماسەلەسىنە وڭ ىقپال ەتەتىنىن ايتتى. رەسەيلىك باق-تىڭ حابارىنا قاراعاندا، كەلەسى اپتادا رەسەيدىڭ ءسىم باسشىسى سەرگەي لاۆروۆ سولتۇستىك كورەياعا ساپارلاي بارماق.

كەشە، پەتەربوردا وتكەن رەسەي مەن فرانتسيا باسشىلارىنىڭ ءباسپاسوز ءماسليحاتىندا پرەزيدەنت پۋتين، رەسەي تارابىنىڭ ترامپ-كيم كەلىسسوزىنىڭ جويىلعانىنا وكىنىش بىلدىرەتىنىن، سەبەبى بارلىق تاراپ كورەي تۇبەگىنىڭ يادرولىق قارۋسىزدانۋى  اقش-كحدر سامميتىنەن باستاۋ الادى دەپ قاراعانىن العا تارتتى. پۋتين سوزىندە: «ءبىز اقش پەن كحدر اراسىنداعى كەلىسسوزدىڭ قالپىنا كەلتىرىلۋىن، تۇراقتى تۇردە سامميت ءوتۋىن ءۇمىت ەتەمىز. سەبەبى، ديالوگ پەن كەلىسسوز بولمايىنشا، كورەي تۇبەگىنىڭ يادرولىق قارۋسىزدانۋى بولمايدى»، – دەدى. ول جانە بارلىق تاراپتى اقش پەن سولتۇستىك كورەيانى جاقىنداستىرۋعا ارەكەت ەتۋگە شاقىردى.

فرانتسيا پرەزيدەنتى ەممانۋەل ماكرونمەن بىرگە وتكىزگەن ءباسپاسوز جيىنىندا پۋتين كيم جوڭ ۋننىڭ شەشىمدەرىن قولدايتىنىن ءبىلدىردى. ول كيم جوڭ ۋننىڭ اقش-پەن كەلىسسوز ءۇشىن يادرولىق پوليگوندى جابۋدى قامتىعان ۋادەلەرىن تولىق ورىنداعانىن، الايدا وسى ارەكەتتەرىنىڭ جاۋابى رەتىندە كەلىسسوزدىڭ كۇشىنەن قالعانىن العا تارتتى.

فرانتسيا پرەزيدەنتى بولسا، قالايدا سولتۇستىك كورەيانىڭ يادرولىق قارۋسىزدانۋ پروتسەسىن جالعاسىن تابۋى كەرەك ەكەنىن ايتتى. ول قىتايدىڭ كورەي تۇبەگى ماسەلەسىن شەشۋگە ارالاسۋى ورىندى دەپ باعالاعان.

رەسەي لاۋازىمدىلارىنىڭ پىكىرىنە قاراعاندا، سولتۇستىك كورەيا داۋى ءالى دە ۇزاققا سوزىلۋى مۇمكىن، سوندىقتان اقش پرەزيدەنتىنىڭ كەلىسسوزدەن باس تارتۋى، جاقىنداعى وڭتۇستىك-سولتۇستىك كورەيا باسشىلارىنىڭ كەزدەسۋ كەلىسىمدەرىنىڭ ناتيجەسىن نولگە تەڭەستىردى دەپ قارايدى. الايدا، بۇل ءۇردىس رەسەي مەن قىتايدىڭ تۇبەكتەگى ديپلوماتيالىق قادامدارىن دامىتۋعا مۇمكىندىك بەرگەنىن دە ايتادى.

رەسەي وسىدان ون نەشە جىل بۇرىن سولتۇستىك كورەيانىڭ يادرولىق قارۋدى دامىتۋ ءىسى قيىر-شىعىسقا قاتەر توندىرۋىنەن الاڭداپ، كوپتەگەن ەسكەرتۋلەردى جاساپ كەلگەن. بىراق، جۇرە كەلە رەسەيدىڭ سولتۇستىك كورەياعا قاراتقان ەسكەرتۋلەرىنىڭ داۋىسى باسەڭدەي بەردى. سەبەبى، سولتۇستىك كورەيانىڭ قادامدارى اقش-قا باعىتتالعانى انىق بولا باستاعان. بۇل تۇستا رەسەي وزىنە قاۋىپ تونبەيتىن بولعان سوڭ دا كيم اۋلەتىنىڭ رەجيمىنە توقتاۋ ايتپادى.

دەگەنمەن، قازىرگى جاعدايعا قاراتا كەيبىر ساراپشىلار، رەسەيدىڭ سولتۇستىك كورەيا رەجيمىنە جاقىنداسۋى وزىنە ۇلكەن تيىمسىزدىكتەردى الىپ كەلەدى دەپ قارايدى. سەبەبى، حالىقارالىق قاۋىمداستىقتا رەسەيدىڭ قازىرگى ءيميدجى ايتارلىقتاي ماقتاۋعا تۇرمايدى. ال، دارا بيلەۋشى سانالاتىن كيم رەجيمىمەن جاقىنداسۋ رەسەيگە دەگەن قىسىمدى ەسەلەپ ارتتىرۋى مۇمكىن.

 “The Qazaq Times”