فوتو: كورنەكى سۋرەت

وزبەكستان مەن تۇركىمەنستان ءبىراز ۋاقىتتان بەرى شەشىمىن تاپپاي كەلە جاتقان مەملەكەتتىك شەكارانى دەماكاتسيالاۋ تۋرالى ماسەلەنى تاعى دا قاراستىردى، دەپ حابارلايدى وزبەكستان ءسىم-ءنىڭ ءباسپاسوز قىزمەتى.

وزبەك-تۇرىكمەن ۇكىمەتارالىق بىرىككەن كوميسسياسى جۇمىس توبىنىڭ كەزەكتى كەزدەسۋى وزبەكستاننىڭ حورەزم وبلىسىنا قاراستى ۇرگەنچ قالاسىندا 14-20 مامىر كۇندەرى ءوتتى. كەزدەسۋ بارىسىندا ەكى ەل اراسىنداعى شەكارانى جۇرگىزۋ مەن مەجەلەۋ ماسەلەلەرى تالقىلاندى. وزبەكستان ءسىم-ءنىڭ ءباسپاسوز قىزمەتىنىڭ حابارلاۋىنشا، تاراپتار شەكارانىڭ جەكەلەگەن بولىكتەرىنە قاتىستى اتقارىلعان توپوگرافيالىق ورتاق جۇمىستاردىڭ ناتيجەسىن قاراستىرعان. كەزدەسۋ قورىتىندىسى بويىنشا، 2018 جىلعا ارنالعان جوسپار-كەستە اياسىنداعى جۇمىستى ودان ءارى جالعاستىرۋعا كەلىسىم جاسالعان. ەگەر، وڭتۇستىكتەگى كورشىلەرىمىز اتالعان كەلىسىمشارت اياسىنداعى جۇمىستارىن وسى قارقىنمەن جالعاستىرا بەرسە، بۇعان دەيىن ەكى ەل اراسىنداعى ءبىراز كەلەڭسىزدىككە سەبەپ بولعان شەكارا ماسەلەسى دە بىرجاقتى بولاتىن سياقتى.

“The Qazaq Times”