اقش پرەزيدەنتى دونالد ترامپ ناتو باس حاتشىسى ستولتەنبەرگپەن اق ۇيدە وتكەن كەزدەسۋىنەن كەيىن، باق وكىلدەرىنىڭ سۇراقتارىنا جاۋاپ بەردى. ترامپ بۇل كەزدەسۋمەن قاتار ءوتىپ جاتقان اقش-قىتاي اراسىنداعى ساۋدا كەلىسسوزدەرىنىڭ ەكىنشى كەزەڭى تۋرالى پىكىر ءبىلدىردى. ول قىتايمەن ساۋدا كەلىسىمىنەن تابىستى ناتيجە كۇتە المايتىنىن قايتالادى. بۇل تۋرالى «شينلاڭ» اقپاراتتىق سايتى حابارلاعان بولاتىن.

ترامپ سوزىندە: «كەلىسسوز ءساتتى بولاتىنا سەنە المايمىن. سەبەبى، قىتاي كوپ ەركەلەپ كەتتى. ەۋروپا وداعى دا، وزگەلەر دە قاتتى ەركەلەپ كەتكەن. اقش-تان نە سۇراسا سونى الادى. بىراق، بۇلاي جالعاستىرۋعا رۇقسات بەرە المايمىز»، – دەدى.

ترامپ بۇل سوزدەرىنىڭ اراسىندا جاپونيا مەن وڭتۇستىك كورەيانى دا اتاپ ءوتتى. كەلىسىمدەردىڭ ءبارى اقش-قا ءتيىمسىز جاعدايدا جاسالىپ كەلگەنىن العا تارتتى. سونداي-اق، قىتايدىڭ كوپتەن بەرى قۇراما شتاتتى الداپ كەلگەنىن باسا ايتتى. ول: «بىراق، بۇل تۋرالى قىتايدى ايىپتامايمىن، اقش-تىڭ بۇرىنعى ۇكىمەتتەرى كىنالى»،– دەدى.

ايتا كەتەيىك، بەيسەنبى كۇنى باستالعان اقش-قىتاي ساۋدا كەلىسسوزى ناتيجەسىز اياقتالىپ، جۇما كۇنى ەكىنشى اينالىمىن باستاعان بولاتىن.

“The Qazaq Times”