كورەي تۇبەگىندەگى بەيبىتشىلىك پروتسەسىنە كەرى ىقپال ەتكەن كىم؟

بەيبىتشىلىككە قاراي قادام باسقان كورەي تۇبەگى ماسەلەسىندە وسى اپتادا بىرقاتار كەرى پروتسەسس تە بولدى. ايتالىق، سولتۇستىك كورەيا تارابى «اقش ءبىزدى جەدەل يادرولىق قارۋسىزدانۋعا يتەرمەلەي بەرسە، كەلىسسوزدى توقتاتا تۇرامىز» دەگەن مالىمدەمەلەردى دە جاسادى.

سولتۇستىك كورەيانىڭ رەسمي اقپارات اگەنتتىگى سول ەلدىڭ سىرتقى ىستەر مينيسترلىگى تارابىنان بەرىلگەن رەسمي مالىمدەمەنى جاريا ەتتى. وندا: «ەگەردە اقش ءبىزدى تۇيىققا تىرەپ، وزەكتى قۇرالدان باس تارتۋدى تالاپ ەتە بەرسە، وندا كەلىسسوز ءبىز ءۇشىن ەش قىزىق ەمەس. الداعى اقش-پەن بولاتىن كەلىسسوز تۋرالى دا قايتالاي ويلاناتىن بولامىز»، – دەلىنگەن بولاتىن.

ەستەرىڭىزدە بولسا ترامپ-كيم كەزدەسۋى 12 ماۋسىم كۇنى سينگاپۋردە وتەدى دەپ بەلگىلەنگەن بولاتىن. BBC-ءدىڭ سولتۇستىك كورەياداعى تىلشىلەرىنىڭ حابارىنا قاراعاندا، كحدر رەجيمى كەزدەسۋدى رەسمي تۇردە كۇشىنەن قالدىرماعان، الايدا، ترامپ پەن كيم اراسىنداعى كەزدەسۋدىڭ مۇمكىندىگى ازايعان. بۇنىڭ الدىندا سولتۇستىك كورەيا سارسەنبىگە جوسپارلانعان وڭتۇستىك كورەيامەن وتەتىن كەلىسسوزدە كۇشىنەن قالدى. بۇل كەلىسسوزگە ەكى تاراپتان تەڭدەي ماقۇلدىق بەرىلىلىپ، ەكى ەل اراسىنداعى ۇساق-تۇيەك ماسەلەلەرگە دەيىن تالقىلانادى دەپ كۇتكەن.

ساۋىردەگى وڭتۇستىك پەن سولتۇستىك كورەيا باسشىلارىنىڭ كەزدەسۋىندە كەلىسىلگەن مازمۇندار:

·        تاراپتار ءبىر-بىرىنە دەگەن دۇسپاندىق ساياساتىن توقتاتۋ;

·        ەكى ەل شەكاراسىنداعى دەميليتاريزاتسيالانعان ايماقتى «بەيبىتشىلىك ايماعى» رەتىندە قۇرىپ، شەكارا وڭىرلەردىڭ بايلانىسىن جاقسارتۋ;

·        وڭىردەگى اسكەري قۇرال-جاراقتاردى قىسقارتۋ جانە اسكەري جاتتىعۋلاردى ازايتۋ;

·        قىتاي جانە رەسەيدىڭ قاتىسۋىمەن ءتورت تاراپتى كەلىسىمدى جۇزەگە اسىرۋ.

«وتقا ماي قۇيۋ»

وڭتۇستىك كورەيا مەن اقش اراسىنداعى ءداستۇرلى بىرلەسكەن اسكەري وقۋ-جاتتىعۋلار سولتۇستىك كورەيانىڭ شامىنا ءتيىپ وتىر. بىلتىرعا دەيىن سولتۇستىك كورەيا بۇنداي اسكەري جاتتىعۋلاردى «وتقا ماي قۇيۋ» دەپ اتاپ، سوعىس اشام دەپ قورقىتىپ كەلگەن ەدى.

دەگەنمەن، وڭتۇستىك كورەيا جۇزگە جۋىق اسكەري ۇشاق قاتىسقان كەزەكتى اسكەري جاتتىعۋدىڭ بۇرىنعىدان الدە قايدا شاعىن ەكەنىن العا تارتتى. اقش پەن وڭتۇستىك كورەيا بۇنداي اسكەري جاتتىعۋدىڭ تەك قورعانىس قۋاتىن شىڭداۋ ءۇشىن جاسالعانىن ايتىپ، ءارى بۇل ەكى ەل اراسىندا كوپ جىلدان بەرى جۇزەگە اسىرىلعان كەلىسىم ەكەنىن ايتۋدا.

بەيرەسمي كەزدەسۋ كەرى اسەرىن تيگىزدى

شەتەل ساراپشىلارىنىڭ ءبىر ءبولىمى، سولتۇستىك كورەيانىڭ كەلىسسوزدەرگە دەگەن ىنتاسىنىڭ جوعالۋى كيم مەن قىتاي باسشىسى اراسىنداعى كەزدەسۋدىڭ ىقپالى دەپ قارايدى. وسىدان بۇرىن سولتۇستىك كورەيا مەن قىتاي باسشىسى 6 اپتا ىشىندە ەكى رەت بەي رەسمي كەزدەسۋ وتكىزىپ، سىرت ەلدەردى ەلەڭ ەتكىزگەن. ءارى كەزدەسۋدە ناقتى نە تاقىرىپتاردىڭ تالقىلانعانى انىق ەمەس. قالاي بولماسىن، قىتاي باسشىسىمەن كەزدەسۋ سولتۇستىك كورەيانىڭ بەيبىتشىلىككە دەگەن ۇمتىلىسىنا كەرى باعىتتان ىقپال ەتىپ وتىر.

“The Qazaq Times”