اقش پرەزيدەنتى دونالد ترامپ قىتاي ۆيتسە-پرەمەرى ليۋ حەمەن كەزدەستى – دەپ حابارلايدى اق ءۇي ءباسپاسوز قىزمەتى.

«پرەزيدەنت دونالد ترامپ قىتاي مەملەكەتتىك كەڭەسىنىڭ ۆيتسە-پرەمەرى ليۋ حەمەن مامىر ايىنىڭ 17-ءى كۇنى ۋاشينگتوندا كەزدەستى. كەزدەسۋ بارىسىندا ەكى ەل اراسىنداعى ساۋدا-ەكونوميكالىق قارىم-قاتىناس جونىندە اڭگىمە قوزعالدى» - دەلىنگەن اق ءۇي ءباسپاسوز قىزمەتى تاراتقان مالىمدەمەدە.

جەرگىلىكتى باق وكىلدەرىنىڭ مالىمەتىنشە، مامىر ايىنىڭ 18 كۇنى قىتاي مەن اقش رەسمي وكىلدەرىنىڭ قاتىسۋىمەن ۋاشينگتوندا كەڭەيتىلگەن وتىرىس وتەدى. الدىن الا بولجامدار بويىنشا وعان اق ءۇي تاراپىنان قارجى ءمينيسترى ستيۆەن منۋچين، ساۋدا ءمينيسترى ۋيلبۋر روسس جانە ساۋدا وكىلى روبەرت لايتحانزەر قاتىسادى. اتالمىش باس قوسۋدا قىتاي تاراپى اقش-تان دونالد ترامپ ەنگىزگەن سانكتسيالاردىڭ كۇشىن جويۋدى، دۇنيەجۇزى ساۋدا ۇيىمىنا دەمپينگتى باعاعا بايلانىستى جازعان ارىزىن كەرى قايتارۋدى جانە «ينتەللەكتۋالدى مەنشىك ۇرلىعى» ءىسىن توقتاتۋدى سۇرايدى دەپ كۇتىلۋدە.

ەستەرىڭىزگە سالايىق، 23 ناۋرىز كۇنى اقش پرەزيدەنتى دونالد ترامپ سىرتتان كەلەتىن اليۋميني مەن بولاتقا باج سالىعىن 10 جانە 25 پايىزعا وسىرگەن. قىتاي ترامپتىڭ بۇل شەشىمىن قاتاڭ سىنعا الىپ، اقش حالىقارالىق ساۋدا كەلىسىمىن بۇزدى دەپ ايىپتاعان جانە 128 امەريكالىق كومپانيا ونىمدەرىنە باج سالىعىن قىمباتتاتقان.

“The Qazaq Times”