س.نارىمبەتوۆ: اقشاسىن شەشىپ بەرسە، الاش تۋرالى كينو تۇسىرۋگە دايىنمىن

بيىل الاشتىڭ 100 جىلدىعى، سوعان وراي ۇكىمەت باسشىسىنىڭ ورىنباسارى ي.تاسماعامبەتوۆ ارنايى جيىن اشىپ، دايىندىق جاساۋ جايىن ايتتى. ونىڭ قاتارىندا كينو ءتۇسىرۋ تاقىرىبى دا قوزعالدى. ءبىز، وسىعان بايلانىستى بەلگىلى كينورەجيسسەر ساتىبالدى نارىمبەتوۆكە حابارلاسىپ، پىكىرىن سۇراعان ەدىك. 

س.نارىمبەتوۆ: الاش ارىستارى تۋرالى كينو ءتۇسىرۋ قازاق رەجيسسورلارىنىڭ ءبارىنىڭ ارمانى. مەن “امانات”، “مۇستافا شوقاي” فيلمدەرىن تۇسىردىم. ەندى، الاش ارىستارىن، سونىڭ ىشىندە ءاليحاندى تۇسىرسەم دەپ ارماندايمىن. تەك سونى جۇزەگە اسىرۋعا جوعارعى جاقتىڭ قولداۋى كەرەك. نەگە ەكەنىن قايدام، ەكسپو،  ۋنيۆەرسيادا وتكىزۋگە اقشا تابىلادى. ال، الاشقا كەلگەندە قارجى جەتپەي قالادى. الاش تۋرالى “ۇلكەن ءبىر جۇمىس” جاسالۋ كەرەك دەپ ايتىلعالى قاي زامان. بۇل قازاقتىڭ ەرتەڭى ءۇشىن كەرەك دۇنيە عوي. ەرتەڭگى بولاشاق ءۇشىن، ۇرپاق تاربيەسى ءۇشىن، ۇلتتىق سانانى بەكەمدەۋ ءۇشىن، مەملەكەتتىلىكتى قۋاتتاندىرۋ ءۇشىن كەرەك. توق ەتەرىن ايتقاندا، قازاققا كەرەك دۇنيە. ال، وسى قازاققا كەرەك دۇنيەدەن جوعارعى جاقتاعىلاردىڭ نە ءۇشىن باسىن الا قاشاتىنىن تۇسىنبەيمىن. ءالى ەشنارسە ىستەلگەن جوق. ءيا ۇكىمەت باسشىسىنىڭ ورىنباسارى يمانعالي تاسماعامبەتوۆ مىرزا الاش تۋرالى الاشتىڭ 100 جىلدىعىنا دايىندالۋ جايلى ايتتى. ەندى سول ءسوز راس بولىپ، قارجىسىن شەشىپ بەرسە رەجيسسەرلاردىڭ قاي-قايسىسى دا تاس-ءتۇيىن دايىن.

بىزدەن باسقا ەلدەر، تاريحتى ارىدان قوزعاپ جاتىر. مىسالعا پۋتين سكيفتەردەن، شىڭعىسحاننان باستاپ، بارلىعىن وزىنە تارتىپ كينو ءتۇسىرتىپ جاتىر. ءبىز “قازاق حاندىعىعىڭ” ءوزىن ءالى تولىق ءتۇسىرىپ بولا الماي جاتىرمىز. اقشا بولىنبەيدى. رەجيسسەرعا ۇلكەن قارجىلىق دەمەۋ بولماسا، ەش نارسە ىستەي المايدى. اۋقىمدى دۇنيە جاساۋ ءۇشىن ۇلكەن قولداۋ كەرەك. ءبىزدىڭ جوعارعى جاقتا وتىرعان كوكەلەرىمىز نەگە ەكەندىگى بەيمالىم، ۇلتتىق، كولەمدى دۇنيەلەرگە كەلگەندە قۇلىقسىز.

 «The Qazaq Times»